ऐतिहासिक तथ्यं नं कालापानी व लिपुलेक नेपाःया भूभाग
प्रधानमन्त्री केपी शर्मा ओलीया परराष्ट्र मामिला सल्लाहकार डा. राजन भट्टराईं ऐतिहासिक तथ्यं नं कालापानी व लिपुलेक नेपाःया भूभाग जूगु धयादिसें थःपिं उगु हे मान्यताय् अडिग जूगु स्पष्ट यानादीगु दु ।
 
 
थौं बुधवाः रिपोर्टस क्लब नेपालया साक्षात्कार ज्याझ्वलय् न्ववानादिसें डा. भट्टराईं धयादिल, ‘कालापानी नेपाःया भूभाग खः । ऐतिहासिक तथ्यं नं थ्व हे धाइ । झीगु मान्यता नं थ्व हे खः ।
 
 
सन् १९६२निसें अन च्वनाच्वंपिं भारतीय सेना चिला वनेमाः । कालापानी लिसेंया फुक्क सीमा विवाद ज्यंकेमाः ।’
 
 
सीमा विवाद कूटनीतिक टेबलय् च्वनाः ज्यंकेमाःगुलिइ वय्कलं बः बियादिल । यकःति ढंगपाखें याःगु निर्णय अमान्य जुइगु खँ धयादिसें डा. भट्टराईं धयादिल, ‘न्ह्याथेंजाःगु समस्याया समाधान कूटनीतिक निष्कर्षय् थ्यंकेमाः ।’