ओलम्पियन कासामिपिनिगु कोरोना बीमा याइग
लहनान्युज | ञंलागा ४ ११४०,भाद्र २१ आइतवाः
नेपाल ओलम्पिक कमिटी (एनओसी) नं दक्को ओलम्पियन कासामिपिनिगु कोरोना बीमा याना बिइगु जुगु दु । एनओसीया शनिवाः भर्चुअल बैठकं ओलम्पिकय् नेपालपाखे प्रतिनिधित्व याइपि दक्को कासामिपिनिगु बिमा यायेगु निर्णय याःगु दु ।
अथेहे उगु बैठकं ओलम्पियन नाप ओलम्पिकयो तयारी यानाच्वपि कासामि व प्रशिक्षक, ओलम्पिक कमिटिया पदाधिकारी, साधारण सभा सदस्य, एनओसी कमिसनया सदस्य नाप दक्को कर्मचारीपिनिगु कोरोना बिमा यायेगु निर्णय याःगु दु ।
थ्व नाप, एनओसीं कोरोना संक्रमित महासचिब निलेन्द्रराज श्रेष्ठ नाप मेपि कर्मचारी कोरोनामुक्त जूगु न जानकारी बिःगु दु । उगु बैठकं कोरोना संक्रमित नेपालया न्हापाम्ह अन्तर्राष्ट्रिय पदक विजेता ओलम्पियन जितबहादुर केसीया भिं उसाँय् या कामना याःगु दु । केसी न कोरोना संक्रमण जूम्ह खः ।
उगु बैठकं एनओसीया मेडिकल कमिसनया अध्यक्ष डाक्टर सरोज कृष्ण श्रेष्ठयात संघया कार्यालय संचालनया लागि न्हुम्ह सुरक्षा प्रोटोकल तयार यायेगु निर्देशन बिउसे दक्को डब्लुएचओ व नेपाल सरकारं बिःगु नियमयात पालना यायेत इनाप याःगु दु ।
Categorized in कासा
