२०८१ जेठ १२, शनिबार

ओलीया पलाः तानशाही जुजुं वनाच्वंगु : कांग्रेसया वरिष्ठ नेता पौडेल

लहनान्युज | ने.सं. ११३९ बछलागा त्रियोदशि (१ जुन, २०१९)

नेपाली कांग्रेसया वरिष्ठ नेता रामचन्द्र पौडेलं प्रधानमन्त्री केपी शर्मा ओलीया पलाः तानशाही जुजुं वनाच्वंगु द्वपं बियादीगु दु ।
 
 
पार्टीया जागरण अभियानया झ्वलय् सुर्खेत थ्यंकादीम्ह नेता पौडेलं उगु खँ धयादीगु खः । वय्कलं न्यायालय व संवैधानिक निकायस हस्तक्षेप याःगु थुकिया प्रारम्भिक चरण जूगु नं धयादीगु दु ।
 
 
नेता पौडेलं धयादिल, ‘संघीयता अःखः, संविधान अःखः ज्या याना वनाच्वंगु दु, फुक्क अधिकार थःपाखे केन्द्रीत याःगु दु ।’ नेकपाया दुई तिहाई सरकारं जनताया मतया दुरुपयोगु याःगु द्वपं बियादिसें नेकपां चुनावय् क्यंगु म्हगस अःखः ज्या यानाच्वंगु धयादिल ।
 
 
सरकारं आः नं स्थानीय व प्रदेश सरकारयात अधिकार मब्यूगु नेता पौडेलया धापू दु । ‘आः नं केन्द्रपाखें हे बजेट बीकथं केन्द्रीकृत शासन यायेत स्वःगु दु ।’ नेता पौडेलं धयादिल, ‘सांसदयात करोडौं तका इनाः उपभोक्ता समिति दयेकाः भ्रष्टाचार यायेगु मनसाय सरकारं याःगु दु ।’
Categorized in राजनीति