औपचारिकता जक पूवंकुसें यलय् नृसिंह जात्रा क्वचाल
शिवेश शर्मा | गुंलागा पञ्चमी ११४० (२०७७ साउन २४) शनिबाः
कोरोना महामारी व संक्रमणया जोखिम दथुइ यलय् औपचारिकता जक पूवंकुसें यलय् नृसिंह जात्रा (उपाकलं सायाः) क्वचाःगु दु ।
यलया द्यःब्रम्हू राजोपाध्यायतय् उपाकर्म गुथिपाखें न्ह्याकावःगु उपाकलं सायाः थौं साधारण किसिमं नृसिंहलिसें लक्ष्मी सरस्वती अले प्रल्हादयात नगर परिक्रमा याकुसें क्वचाःगु खः ।
अप्सरागण, भजन खलः, धिमेय् पुचः आदि थुगुसी छुं हे मतःसे द्यःगणपिं जक यलया सायाः रुटय् चाःहिकूगु खः ।
उपाकर्म गुथि यलया दुजःपिनि दथुइ ज्येष्ठताया आधारय् पाः बियाः न्ह्याकीगु जात्राया थुगुसीया पाः मदुम्ह कुमारधर शर्मायागु खः । पाःवाला शर्मा मदयावंगुलिं वयकःया काय् शौरभकुमार शर्मां जात्रा न्ह्याकूगु खः ।
पाः लाःम्हेसिया छेँय् नं जात्रा पिकयाः अन हे क्वचायेकेगु परम्परा कथं पाःलाःम्ह शर्माया छेँय महाःद्यःननिइ जात्रा पिकयाः यलया सायाः रुट चाःहिकाःलि महाःद्यःननिइ हे जात्रा क्वचायेकूगु खः ।
संक्रमणया जोखिमयात ध्यानय् तयाः द्यःया दर्शन याकेबीगु व थायथासय् पूजा कायेगु ज्या नं थुगुसी मजू ।
जात्राय् भीड नियन्त्रण यायेत च्वंपिं स्वयमसेवतयसं नं पिपिई, मास्क, पञ्जालिसेंया सुरक्षाया उपाय ल्यूगु खः ।
थुगुसी जात्रा हे जुइला मजुइला धइगु अलमलया दथुइ सरकारपाखें जात्रापर्व न्ह्याकेत निर्देशिका जारी जूगुलिसें उगु हे निर्देशिकायात लिनाः जात्रा याःगु खः ।
थुगु जात्रा सुथांलात कि देशय् प्राकृतिक प्रकोप, महामारी आदिं दुःख मजुइगु जनविश्वास दु ।
न्हापा श्रीधर नारायणया जात्रा न्ह्यानावःगुलिइ दथुइ छुं कारणं उगु जात्रायात दिकाः नृसिंहया जात्रा न्ह्याकूगु धयातःगु दु ।
ताःई न्ह्यवःनिसें न्ह्यानावःगु धयातःगु थुगु जात्राया लिखित ईतिहास धाःसा सिद्धिनरसिंहया शासनकालनिसेंया जक लूगु दु ।
Categorized in राष्ट्रिय
