कंगोय् ज्वामुखी तज्यात
बछलाथ्व द्धादशी ११४१,जेष्ठ ९ आईतवाः
कंगोय् ज्वालामुखी तज्याःगुलिं सम्भावित क्षतियात मध्यनजर यानाः अन जःखःया सर्वसाधारण मनूतय्त सुरक्षित थासय् स्थानान्तरण याकूगु दु ।
कंगोया मू शहरं थ्यंमथ्यं १०गू किलोमिटरया दूरीइ ज्वालामुखी तज्याःगु खः । नाराग्गो पहाडय् न्हियान्हिथं ज्वालामुखी तज्यानाच्वंगुलिं उगु क्षेत्र जःखःया मनूतय्त सुरक्षित थासय् यंकूगु धागु दु ।
ज्वालामुखी तज्याःगुनाप उकिया लाभा बाः वनाः विमानस्थललिक्क थ्यंगु दु । थ्वहेदथुइ सरकारं आपतकाल घोषणा याये न्ह्यः सर्वसाधारण मनूतय्त थःथःगु थाय् त्वःतवनेत धागु खः । आःतक मानवीय क्षति जूगु बुखँ सार्वजनिक मजूनीगु खःसां उकिया सम्भावना दुगुलिं कंगोया सरकार सचेत जूगु दु ।
थ्वसिवे न्हयः सन् २००२ य् न ज्वालामुखी तज्यानाः २५०म्ह मल्याक मनूत सीगु खः । थ्यंमथ्यं छगू लख २०द्व मनूत घरबारबिहीन जुइमाःगु खः ।
Categorized in अन्तर्राष्ट्रिय
