कन्हेनिसें ताःहाकगु दूरीया यातायात न्ह्याइगु
दिल्लाथ्व चतुर्दशी ११४१,साउन ८ शुक्रवाः
जिल्ला प्रशासन ज्याकू येँ नं शनिबाःनिसें मध्यम व तःहाकगु दूरीया सार्वजनिक यातायात न्ह्याके बिइगु जूगु दु । यातायात न्ह्याकेत माःगु व्यवस्था यायेत प्रशासनं यातायात व्यवसायीपिन्त इनाप तकं याःगु दु ।
जिल्ला प्रशासन ज्याकुथिं शुक्रबाः छगू सूचं न्ह्यब्वसें त्रिभुवन विश्वविद्यालय व लोकसेवा आयोग लगायतया परीक्षायात ध्यान तसें तोके यानातःगु मापदण्ड पूवंका सार्वजनिक यातायात न्ह्याकेत उजं बिउगु खः ।
प्रशासनया विज्ञप्ति न्ह्यथनातःगु दु कि “मन्त्रीपरिषदया मिति २०७८–०४–०४या निर्णय कथं त्रिभुवन विश्वविद्यालय व लोकसेवा आयोग लगायतपाखें परीक्षाया ज्याझ्वः सार्वजनिक जूगुलिं देय्या थीथी थासं जुइगु परीक्षा व सर्वसाधारणया वय्वनेगु यात अपुकेत स्वनिगःया दक्वः यातायात व्यवसायीपिन्सं सरकारं तोके यानातःगु जनस्वास्थ्य मापदण्ड पूवंका मध्यम लिसें ताःहाक दूरीया सार्वजनिक यातायात न्ह्याकेगु व्यवस्था यायेत इनाप दु ।”
अथेहे प्रशासनं अनिवार्य रुपं काउण्टरपाखें टिकट कया जक यात्रा यायेत यात्रुपिन्त इनाप नं याःगु दु ।