कन्ह्यनिसे छ्वासुकल निषेधाज्ञा
लहनान्युज | ञंलागा ७ ११४०,भाद्र २४ बुधवाः
स्वनिगलय् कन्ह्य बिहीवाः निसे पसः व्यवसाय चायेके जिल धइगु सार्वजनिक तथा निजी सवारी साधन न चले याये दइगु जुगु दु । येँ, यलय् व ख्वपया प्रमुख जिल्ला अधिकारीपिन्स स्वगू वाः तक जारी निषेधाज्ञा कन्ह्य निसे छ्वासुकेत न्हुगु आदेश जारी याःगु दु ।
कोरोना संक्रमण अप्वोया वःगुलि स्वनिगः दुने वःगु ४ भदौपाखे निषेधाज्ञा जारी याःगु खः । सुरुइ निवाःया लागि कडा याःगु निषेधाज्ञा स्वगू वाःय् निश्चित ई तोके याना निर्माण सामाग्री ढुवानी तथा बिक्री वितरण खुला याःगु खः ।
बिहीवाः निसे थप सहज जुइ त्यःगु दु ।
सवारीइ जोर विजोर
स्वनिगलय् कन्ह्य बिहीवाः निसे जोर विजोर प्रणालीया आधारय् सवारी साधन सञ्चालन यायेगु ब्यवस्गा याये त्यःगु दु ।
निजी सवारी साधन न जोरविजोरया आधारय् दक्को चले याये दइगु जुगु दु । तर मोटरसाइकल व स्कुटरयात भौतिक दुरी व स्वास्थ्यया मापदण्ड पालना यायेमाःगु जुगु दु ।
सार्वजनिक यातायातया हकय् १६ सिट स्वया अप्वो दुगु क्षमताय् जक चले याये दइ । थथे याना चले याइगु सवारी साधनय् कुल सिट क्षमताया बच्छि स्वया अप्वो मयासे छगु लहरय् छम्ह जक तया यात्रुयात मास्क अनिवार्य याःगु दु ।
चालक व सहचालकं मास्क व पञ्जा अनिवार्य तयेमाः । सवारी साधनया लुखाय् स्यानिटाइजर तयेमा न्हि न्हि निसंक्रमित याये माः ।
अथेहे भाडाया ट्याक्सीइ चालक नाप स्वम्ह व परिवार दुने न्यादँ दुने क्वयाम्ह निम्ह मचा जक तय दइ । मालबाहक सवारी साधन धाःसा जोर विजोर प्रणाली लागू जुइ मखु धका निषेधाज्ञा आदेशय् उल्लेख दु ।
अत्यावश्यक वस्तुया पसः बहनि न चायेके दइ
स्वनिग दुने अत्यावश्यक वस्तु तथा सेवाया पसः आः बहनिया इलय् न चायेके दइगु जुगु दु । भदौ १७ गतेनिसे ११ बजे तक चायेके दइगु पसः आः कन्हयनिसे ५ निसे ७ बजे तक चायेक दइगु जुगु दु ।
थ्व निर्णयया कथं आः खाद्यवस्तु, दुरु, दुरुजन्य पदार्थ, फलफूल तरकारी ला पसः सुथय् ११ बजे तक व बहनि ५ देखि ७ बजे तक चायेके दइ ।
