कर्णाली प्रदेशय् न्हूगु सरकार गठन जुइगु
कौलागा द्धादशी ११४१, कार्तिक १६ मंगलवाः
प्रदेश नम्बर १ व कर्णाली प्रदेशय् थांै न्हूगु सरकार गठन जुइत्यंगु दु ।
प्रदेश १ या एमाले मूख्यमन्त्री भीम आचार्य व कर्णालीया माओवादी मूख्यमन्त्री महेन्द्र शाहीं म्हिगः राजीनामा बिइधुंका उपिं निगुलिं प्रदेशय् थौं न्हूगु सरकार दयेकेत्यंगु खः । कर्णालीइ नेपाली कांग्रेसया जीवनबहादुर शाही मूख्यमन्त्री जुइगु निश्चित जूगु दु । नेकपा ब्वथलेधुंका कांग्रेसलिसे पालंपाः यायेगु सहमति कथं मूख्यमन्त्री शाहीं म्हिगः राजीनामा बियादीगु खः । थुखे, प्रदेश १य् नेकपा एकीकृत समाजवादीया राजेन्द्र राइ मूख्मन्त्री जुयादी ।
नेकपा ब्वथलेधुंका तत्कालिन मूख्यमन्त्री शेरधन राइं राजीनामा बिइधुंका एमालेया हे भीम आचार्य मूख्यमन्त्री जुयादीगु खः । तर एमाले नं ब्वथलेधुंका अल्पतय् लानादीम्ह आचार्यं म्हिगः पदत्याग यायेधुंका नेकपा एसया राई मूख्यमन्त्री जुयादीगु खः ।
थुखे, बागमती प्रदेशया मुख्यमन्त्री राजेन्द्र पाण्डें वइगु कात्तिक २२ गते संसदं भलसाया मत कयादीत्यंगु दु । वंगु कात्तिक ११ गते गठबन्धनया पाखें ५९म्ह सांसदया समर्थनय् प्रदेशया ३म्हम्ह मुख्यमन्त्रीया रुपय् नियुक्त जुयादीम्ह पाण्डें २२ गतेया प्रदेशसभा मुँज्यां विश्वासया मत कायेगु तयारी यानादीगु खः ।
मुख्यमन्त्री पाण्डेया विश्वासया मत सम्बन्धी प्रस्ताव संसद् सचिवालयस दर्ता जुइधुंकुगु प्रदेशसभा सचिवालयं न्ह्यथंगु दु । नेपाःया संविधानया धारा १८८ या उपधारा २ कथं माओवादी केन्द्र, नेपाली कांग्रेस व जनता समाजवादी पार्टीया समर्थनय् नेकपा (एकीकृत समाजवादी) या समर्थनय् मुख्यमन्त्री नियुक्त जुयादीम्ह पाण्डें सरकारया नेतृत्व याःगु ३०न्हू दुने संसदं विश्वासया मत कायेमाःगु संवैधानिक व्यवस्था दु ।
उगु हे कथं मुख्यमन्त्री पाण्डें मन्त्रिपरिषदं निर्णय याका विश्वासया मत सम्बन्धी प्रस्ताव संसद् सचिवालयस दर्ता याकादीगु खः ।
Categorized in राजनीति
