कर्मचारी भर्नाय् अनियमितता याःगु द्वपनय् विशेष अदालतय् मुद्दा दायर
लहनान्युज | ने.सं. ११३९ दिल्लाथ्व पारु (३ जुलाइ, २०१९), बुधवाः
अख्तियार दुरुपयोग अनुसन्धान आयोगं कर्मचारी भर्नाय् अनियमितता याःगु द्वपनय् थौं बुधवाः त्रिभूवन विश्वविद्यालय सेवा आयोगया अध्यक्ष चैतन्य शर्मालिसें १०म्हे विरुद्ध विशेष अदालतय् मुद्दा दायर याःगु दु ।
त्रिभूवन विश्वविद्यालय सेवा आयोगं प्रविधि व प्रशासनपाखे यानाः १६गू पदया नितिं कर्मचारी माग याःगु खः । उकी मध्ये शाखा अधिकृत, लेखा अधिकृत, सहायक कानूनी सल्लाहकार, मुख्य लेखा सहायक, मुख्य कार्यालय सहायक व कार्यालय सहायक यानाः खुगू पदय् जूगु लिखित परीक्षाया ३५गू उत्तर पुस्तिकाय् ल्याः थपघट याःगु लूगु अख्तियारं न्ह्यथंगु दु ।
परीक्षाया लिच्वलय् फेरबदल याःगु द्वपनय् अध्यक्ष शर्मालिसें दुजः चिन्तामणि पोखरेल, प्रशासकीय प्रमुख परशुराम कोइराला, मुख्य कार्यालय सहायक बच्चुराम पाण्डे, आयोगया कर्मचारी ईन्दिरा तिवारी भन्तना, प्राध्यापक टेकनाथ ढकाल, प्राध्यापक गोविन्द ढकाल, सह–प्राध्यापक राजेश्वर न्यौपाने, सह–प्राध्यापक ताराप्रकाश पौडेल व रामबहादुर पाण्डे विरुद्ध भ्रष्टाचार मुद्दा दायर याःगु खः ।
Categorized in राष्ट्रिय
