कर्माक्यां पब्लिक च्वाइस अवार्ड त्याकल
लहनान्यूज | दिल्लाथ्व दशमी ११३७ (जुलाइ ३ २०१७)
नेपाल आदिवासी जनजाति संकिपा महोत्सव २०१७ य् गुरुङ संकिपा कर्माक्यां पब्लिक च्वाइस अवार्ड त्याकेत ताःलाःगु दु ।
आदिवासी जनजाति चलचित्र महासंघया ग्वसालय् येँय् जुयाच्वंगु संकिपा महोत्सवय्संकिपा कर्माक्यां २५द्वः तकालिसें पब्लिक च्वाइस अवार्ड त्याकूगु खः ।
संकिपा महोत्सवया समापन समारोहस मू पाहां आदिवासी जनजाति महासंघया नायः जगत बरामं कर्माक्याया निर्देशक जस्सु गुरुङयात दसिपौ व तका सिरपाः लःल्हानादिल । चलचित्र महासंघया नायः अमृत सुनुवारं खादां न्ययेकादिल ।
उगु हे ज्याझ्वलय् महोत्सवय् ब्वति काःगु प्रत्येक जातीय समुदायया छगू छगू संकिपायात ५द्वः तकालिसें प्रोत्साहन सिरपाः लःल्हाःगु खः । सकसितं जनजाति महासंघया नायः बरामं दसिपौ लःल्हानादिल सा चलचित्र महासंघया नायः सुनुवारं खादां न्ययेकादीगु खः ।
महोत्सवय् थीथी १२गू आदिवासी जनजाति समुदायया १८गू संकिपा दुथ्याःगु दुगु खः । नेवाः समुदायपाखें राकेश महर्जनं निर्देशन यानादीगु कल्लि व राजनलाल जोशीं निर्देशन यानादीगु ईया बाखं संकिपा क्यंगु खः ।
महोत्सवया समापन समारोहस नुगःखँ तयेगु झ्वलय् आदिवासी जनजाति संकिपाकःमिपिन्सं राज्यं थःपिनिगु संकिपायात बेवास्ता याःगु धकाः कुंखिंगु खः । तःधंगु बजारय् वनीगु संकिपा सरहया निती आदिवासी जनजाति संकिपाया नितिं नं लागू यानाः थःपिन्त अन्याय याःगु इमिगु धापू खः ।
आदिवासी जनजातिया तजिलजि हे मथूगू समुदायं संकिपाया निती दयेकाः जनजाति संकिपाय् नं थःपिनिगु हे तजिलजि कुब्वीकेत स्वःगु जनजाति संकिपाकःपिनिगु द्वपं खः ।
ज्याझ्वलय् आदिवासी जनजाति महासंघया नायः जगत वराम, आदिवासी जनजाति चलचित्र महासंघया नायः अमृत सुनुवार, निवर्तमान नायः प्रतिमाया पुन, आदिवासी जनजाति संकिपाकःमि यूवराज मास्की मगर, नेवाः फिल्म सोसाईटीया नायः लुःजः सिंह लिसें नं थःथःगु नुगःखँ तयादीगु खः ।
Categorized in मनोरन्जन
