कलाकारयात राज्यया न्यागूगु अंग दयेकेत माग
लहनान्यूज | चिल्लागा द्वितीया ११३७ (मार्च १४ २०१७)
नृत्य निर्देशक संघ नेपालं थ्व हे चैत १० गते नृत्यगुरु भैरवबहादुर थापायात तःजिक हनीगु जूगु दु ।
थौं यलय् पत्रकार सम्मेलनया ग्वसाः ग्वसें राज्यपाखें कलाकारयात संरक्षणया सः थ्वयेकाः हे थुगु हना ज्याझ्वः यायेत्यनागु संघं धाःगु दु । लिसें कलाकारयात राज्यया न्यागूगु अंगया रुपय् परिभाषित यायेमाःगु माग नं संघं याःगु दु ।
पत्रकार सम्मेलनय् न्वःवासें संघया न्हापांम्ह न्वकूलिसें हना ज्याझ्वः कजि संजय शर्मां राज्यं कलाकारयात तिसा धायेगु याःगु खँय् आपत्ती प्वंकादिल । कलाकार धयापिं ब्वयेगु तिसा मखसें राज्यया छगू अंग हे जूगु शर्माया धापू खः ।
अथे हे संघया नायः भुवनदास श्रेष्ठं नृत्यगुरु थापाया म्हसिका न्ह्यब्वसें कला व कलाकारयात राज्यं ब्वयेगु नितिं जक छ्यलेमज्यूगु धयादिल । लिसें नायः श्रेष्ठं राज्यं कलाकारयात सम्मानया लिसें संरक्षण तकं बीमाःगु सः तसें स्थानीय, राष्ट्रिय, अन्तर्राष्ट्रिय संघसंस्थापाखें सम्मानित जुयादीधुंकूम्ह नृत्यगुरु थापाया हना ज्याझ्वः यायेत्यनागु धयादिल ।
पत्रकार सम्मेलनय् वइगु चैत १० गते कुन्हु राष्ट्रिय नाचघरय् २०१० सालनिसें नृत्य ख्यलय् मदिक्क न्ह्यज्यानाच्वनादीम्ह नृत्यगुरु थापाया योगदानयात च्वछासें दोसल्लां न्ययेकाः हनापौ व तका सिरपाःलिसें हनेगु जानकारी बिल ।
हना ज्याझ्वः धुंकाः सांस्कृतिक न्ह्यब्वया कथं नेपाली चर्या व लोक हुलाप्याखं लिसें भारतया कथक, भरतनाट्यम अले पाश्चात्य हिपहप, बिबोइङ, कन्टेमपररी, साल्सा हुलाप्याखं न्ह्यब्वइगु धाःगु दु ।
Categorized in मनोरन्जन
