कलाकार बाराहीया याकः चित्रकला ब्बज्या
नृपेन्द्रलाल श्रेष्ठ | सिल्लागा पंचमि ११३७ (फेब्रुअरी १६ २०१७)
अपांगयात स्वयेगु दृष्टीकोणय् ह्यूपाः हयेगु लिसें समाजय् फरक क्षमता व उद्यमीशीलताया नमुना न्ह्यब्बयेगु आज्जुं कलाकार रमेश बाराहीया याकः चित्रकला ब्बज्या न्ह्याःगु दु ।
‘बाराही’ चित्रकला ब्बज्याया उलेज्या ज्याझ्वःया मू पाहां बरिष्ठ कलाकार बत्सगोपाल बैद्यं त्वाः देवाय् मत च्याकाः यानादिल । बिस्कं कथया प्रतिभा भाजु बाराहिया थुगु चित्रकला यलया नेवाः छेँ आर्ट ग्यालरीइ न्ह्याःगु खः ।
ज्याझ्वलय कलाकार बाराहीया गुरुपिं बाबुराजा द्यःला, प्रमिला बज्राचार्य, समाजसेवी मोतीशान्ती शाक्य, याकः ईन्टरपेनर ट्रेनर्स व कलाका तीन पाईलाया संस्थापक राजेश बज्राचार्य, नेवाः स्यनाकुथिया नायः रुविन शाक्य व मूपांहा बैद्यं चित्रकला ख्यलय् निरन्तर न्ह्याना च्वनेफयेमा धकाः भिंतुना बियादिल ।
करिब स्वीगू चित्रकलाय् मध्ये छब्ब बाराही समाजया साँस्कृतिक कालिगढ बुंगद्यःया रथ निर्माण सम्बन्धि दु । नेवाः स्यनाकुथिया ग्वाहालिं जूगु चित्रकला ब्बज्या फागुन ९ गते तक न्ह्याइ ।
