कवि बुद्ध सायमि मन्त
लहनान्यूज | थिंलागा द्वादशी ११३७ (डिसेम्बर २५ २०१६)
नेपालभाषा साहित्यया पुलांम्ह कवि लिसें पुलांम्ह सभासद् बुद्ध सायमि मन्त ।
लीभर व मधुमेहया समस्या जुयाः जाउलाख्यःया अल्का अस्पतालय् वासः याकाच्वनादीम्ह सायमि थौं सनिलया ५ताः इलय् मदुगु खः । वंगु सोमबाःनिसें अस्पतालय् भर्ना जूम्ह वयकःया उसाँय् अवस्था आपाः हे स्यनावँसेंलि म्हिगः वयकःयात आइसीयूलय् तःगु खः ।
वंगु सोमबाः थःगु हे छेँय् बेहोस जुइवं वयकःयात अस्पताल यंकूगु खःसा उगु इलंनिसें अन वासः यानाच्वंगु खः ।
कवि सायमिया काय् कन्हय् जक अमेरीकां वयेत्यंगु जूगुलिं वयां लिपा जक मदुम्ह सायमिया अन्त्येष्टि याइगु धाःगु दु ।
मदुम्ह सायमिया यक्व हे नेपालभाषाया चिनाखँलिसें चिनाखँ सफूत पिदंगु दु । लिसें वयकः न्हापांगु संविधानसभाय् नेपाः राष्ट्रिय पार्टिया समानुपातिकपाखेया सभासद तकं खः ।
मदुम्ह सायमिया कविताय् आपाः यानाः विदोहया भावनां जायाच्वनीगु जूगुलिं वयकःयात विद्रोहि कवि तकं धायेगु याः ।
Categorized in राष्ट्रिय
