कांग्रेस जिल्ला सभापतिपिनिगु माग
दिल्लागा द्धितिया ११४१, साउन ११ सोमबाः
नेपाली कांग्रेसया जिल्ला सभापतिपिन्सं वडा अधिवेशन लिछ्यायेगु पार्टी पदाधिकारी मुँज्याया निर्णयलय् आपत्ति न्ह्यथंगु दु ।
येँय् दूपिं जिल्ला सभापतिपिं व महासमिति दुजःतयेसं १४ क्वःगु महाधिवेशनया धलः थुखेउखे यायेगु नेतृत्वया निर्णयप्रति असन्तुष्टी न्ह्यथंगुृ दु । पार्टीं जिल्ला कार्य समिति लिसेया क्वयेय्या तहया भूमिका कमजोर दयेका यंकुगुलिइ नं उमिगु आपत्ति दु ।
येँय् दूपिं जिल्ला सभापति व महासमिति दुजः दथुइ मुँज्या याना थथें हे वडा अधिवेशनया मिति क्वजिइत माग जूगु नुवाकोट कांग्रेस सभापति जगदीश्वरनरसिंह केसीं धयादील । थ्वयान्ह्यः महासमिति मुँज्यां याःगु निर्णय नं उल्टे यायेगु ज्या जूगुलि इ उमिसं विरोध न्ह्यथंगु खः ।
साउन १२ य् वडा अधिवेशन यायेगु धाःसा नं ई मगाःगु धका लिछ्यागु दु । अधिवेशनया न्हूगु मिति क्वजिउगु मदुनि । केन्द्रीय दुजः रमेश लेखकया नेतृत्वय् कांग्रेसं क्रियाशील सदस्यता छानबिन समिति दयेकुगु दु । उगु समितिं बारा व सप्तरीया कचवं ज्यंके फूगु मदुनिसा थ्यंमथ्यं सच्छि व २५गू वडाया कचवं ज्यंकेगु ल्यं हे दनिइ ।
समितिइ ५द्वः उजुरी लाःगु खः । थ्वखुसिइ कांग्रेसं ९ गू लख क्रियाशील सदस्यता थ्यंकुगु दु । क्रियाशीलय् कचवं क्यना अधिवेशननिसें महाधिवेशन लिछ्यायेत स्वगु धका कांग्रेसय् नेतृत्वया विरोध जुइगु न्ह्यागु दु । कांग्रेसं भदौ १६ निसें १९ तक्क केन्द्रीय महाधिवेशन यायेगु धाःगु खः ।
Categorized in राजनीति
