नेपाली कांग्रेसया १४क्वःगु महाधिवेशन अन्तर्गत उम्मेदवारी दर्ता याःपिन्त थौं सुथय् ११ताः ईतकदुने उम्मेदवारी लित कायेत धागु दु ।

कांग्रेस निर्वाचन समितिं जारी याःगु निर्वाचनया ज्याधलःकथं थौं सुथय् ११ताः ईतक उम्मेदवारतय्सं मनोनयन लित कायेफइगु जूगु दु । उम्मेदवारीतय्त दाबी, विरोध व जाँचबुझया ई म्हिगः सनिलय् ७ताः ईतक दुगु खः ।

अथेहे थौं न्हिनय् १२ताः ईलय् उम्मेदवारतय्गु न्हापांगु नांधलः प्रकाशन यायेगु ज्याधलः दु । कन्हय् सुथय् ८ताः ईलंनिसें न्हूगु नेतृत्वया नितिं मतदान याकीगु ज्याझ्वः दु ।

वंगु शुक्रवाःनिसें न्ह्याःगु महाधिवेशनय् म्हिगः उम्मेदवारतय्गु मनोनयया दिं जूगुलिं नेतृत्वया नितिं ६म्ह मैदानय् दु ।

वर्तमान सभापति शेरवहादुर देउवा, उपसभापति विमलेन्द्र निधि, पूर्व महामन्त्री प्रकाशमान सिंह, केन्द्रीय दुजः डा.शेखर कोइराला, युवा नेता कल्याण गुरुङ व कांग्रेस गोरखाया सभापति युवराज न्यौपानें सभापतिया नितिं उम्मेद्वारी ब्यूगु दु ।

कांग्रेसया १४क्वःगु महाधिवेशनय् पदाधिकारीनापया सछि व ३४गू पदया नितिं ५सः व ४८म्हेसिनं उम्मेदवारी दर्ता याकुगु दु । १३म्ह पदाधिकारीया नितिं ३८म्हेसिनं उम्मेदवारी ब्यूगु दु ।

३५म्ह खुल्ला केन्द्रीय दुजःया नितिं सछि व ९म्हेसिया उम्मेदवारी लाःगु दु । खुला केन्द्रीय दुजलय् अधिकांश पुलांपिं अले स्थापित नेतातय्सं उम्मेद्वारी ब्यूगु दु ।

९म्ह मिसा दुजःया नितिं ३१म्ह, २१म्ह प्रदेश केन्द्रीय दुजःया नितिं ६४म्ह, ५४म्ह केन्द्रीय समावेशी दुजःपाखें २सः व ८३म्हेसिया उम्मेदवारी लाःगु दु ।

थ्वहेकथं थारुपाखेया केन्द्रीय दुजःया नितिं १४म्ह, मधेसीया नितिं ३२म्ह, आदिवासी जनजातिया नितिं ८७म्ह, खसआर्यया नितिं ९३म्ह, दलितया नितिं ३९म्हेसिया उम्मेद्वारी लाःगु दु ।

Categorized in राष्ट्रिय