कांग्रेस हिन्दू राज्य दयेकेगु पक्षय् मदु : उपसभापति निधि
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
प्रमुख प्रतिपक्ष दल नेपाली कांग्रेसया उपसभापति विमलेन्द्र निधिं हिन्दु राज्य दयेकेगु पक्षय् थःगु पार्टी मदुगु धयादीगु दु ।
पार्टीया महामन्त्री डा. शशांक कोइरालां हिन्दु राज्यया पक्षय् वकालत यानाच्वंगु इलय् उपसभापति निधिं हिन्दु राज्य दयेकेगु पक्षय् थःपिनिगु पार्टी मदुगु स्पष्ट यानादिल ।
थौं विहिवाः पार्टी केन्द्रीय ज्याकू, सानेपाय् ग्वसाः ग्वःगु पत्रकार सम्मेलनय् न्ववानादिसें निधिं संविधान निर्माणया नेतृत्व याःगु थःपिनिगु पार्टी धर्म निरपेक्ष राज्यया मान्यतायात स्वीकार यानाः न्ह्याः वनाच्वंगु धयादिल । नेपाली कांग्रेसया ध्वाँसय् तयातःगु प्यंगः नगु मध्ये छगः धार्मिक स्वतन्त्रता जूगु व धर्म निरपेक्षता नं उकिया हे परिपूरक जूगुलिं उगु मान्यताय् अडिग दुगु निधिया तर्क खः ।
