काबुलय् अमेरिका उद्धार ज्या यानाहे च्वनेगु धापू
गुंलागा षष्ठी ११४१, भाद्र १२ सनिवाः
अमेरिकां अफगानिस्तानया काबुल विमानस्थलं अफगान नागरिकतय्गु सकुसल उद्धार यायेगु धागु दु ।
तालिवान व इस्लामिक स्टेट, आईएसया पुचलं उखय् आः न मदिक्क हताः यानाच्वंगु दनि । अफगानिस्तानय् हताः जुयाःच्वंसां अमेरिकां अन फसे जुयाःच्वंपिं सकलें मनूतय्त सुरक्षित कथं उद्धार यायेगु दाबी याःगु दु ।
बिहीवाः काबुल विमानस्थलया गेटलिक्क विस्फोट जूगु खः । उगु घटनाय् अमेरिकी सेनालिसे सीपिनिगु ल्या सछि व ७०म्ह थ्यंगु दु । विस्फोटलिपा अझं हताः जुइफइगु धासें अमेरिकां उकिइ सचेत जुइत इनाप याःगु दु ।
अफगानिस्तानय् मदिक्क हताः जुयाःच्वंगुलिं नाटो सम्बद्ध राष्ट्रतय्सं थःथःगु देशय् सुरक्षा हाथ्या ब्वलंगु धासें आपतकालीन उडानत बन्द याःगु दु ।
थ्वहेदथुइ फ्रान्सं विमानस्थलय् सुुरक्षा हाथ्यायात क्यनाः जहाज मब्वयेकू । फ्रान्सं थ्वसिवे न्ह्यः न स्वद्व मल्याक अफगानी नागरिकतय्त थःगु देशय् छ्वःगु खः । अथेहे, अमेरिकां छगू लख १०द्व मल्याक नागरिकतय्त एयरलिफ्टमार्फत सुरक्षित थासय् यंकूगु खः ।
अमेरिकां आफगानिस्तान त्वःतेगु पूर्व निर्धारित ई क्वचायेत्यंबलय् अन सुरक्षाया दृष्टिकोणं हाथ्या ब्वलनावःगु दु । अमेरिकां धाःकथं काबुल विमानस्थलदुने अझं न्याद्वम्ह मल्याक मनूत अफगानिस्तान त्वःत वनेत जहाज पियाःच्वंगु अवस्थाय् दनि ।
लिपांगु ईलय् अफगानिस्तनय् मदिक्क आतंकवादी हताः अप्वःगुनाप अनया नागरिकतय्सं अझं थःपिं असुरक्षित जूगु महसुस यानाच्वंगु दु । अमेरिकी सेनां थ्वहे अगस्ट ३१ तारिखय् अफगानिस्तान त्वःतेगु धागु खः ।
Categorized in अन्तर्राष्ट्रिय
