काबुल विमानस्थलय् इस्लामिक स्टेटया हताः जुइफुगु अमेरिकी चेतावनी
गुंलाथ्व पञ्चमी ११४१, भाद्र ६ आइतबाः
अमेरिकां अफगानिस्तानय् दुपिं थः नागरिकतय्त इस्लामिक स्टेटं आक्रमण यायेफुगु धासें सतर्क जुयाच्वनेत चेतावनी ब्यूगु दु ।
काबुल विमानस्थल पिने अप्वयावंगु अराजकताया दथुइ म्हिगः बहनी अफगानिस्तानय् दुपिं अमेरिकीतय् लागिं सुरक्षा सल्लाह जारी यासें अमेरिकां अफगानिस्तानस्थित आइएसया शाखां काबुल विमानस्थलय् दुपिं अमेरिकीतय्त हताः जुइफुगु धासें सचेत याकूगु खः ।
विशेष यानाः विमानस्थलया गेट पिने दुपिं अमेरिकीत आइएसया आज्जुइ लायेफुगु चेतावनी ब्यूगु दु । अथे हे, अमेरिक सरकारया प्रतिनिधित्व याइम्ह मनू अले संस्थातय्त नं सचेत याकूगु दु । आःतक्क सार्वजनिक रुपं गनं नं हताःया चेतावनी मवःसां अमेरिकां संभावित खतराप्रति सचेत याकूगु विश्लेषण याःगु दु ।
तालिवानया ग्याःचिकुं अफगानिस्तान त्वःतेत स्वःपिंलिसें अनया पूर्ववर्ती सरकारलिसे ज्या याःपिं व नेटो गठबन्धनयात ग्वाहालि याःपिं मनूतय् भीड विमानस्थल पिने फये हे मफइकथं अप्वःगु दु । शनिबाः विमानस्थल पिने मुंगु भीडयात आःतक्कया हे खराब दिं धाःगु दु ।
२द्वःत्या अमेरिकीलिसें आःतक्क १७द्वःम्हेसित अफगानिस्तान पिने यंकागु नं अमेरिकी धापू दु । जर्मन सरकारं नं काबुल विमानस्थलया सुरक्षा अवस्था तसकं ग्यानापूगु अवस्थाय् दुगु धासें विमानस्थलय् दुहांवने संभव मद्ुगु धाःगु दु ।
अथे हे, स्वीस विदेश मन्त्रालयं नं लिपांगु घण्टाय् काबुल विमानस्थलया सुरक्षा अवस्था स्यंगु धाःगु दु । तालिवानं काबुलय् कब्जा याःसां काबुल विमानस्थल आःतक्क अमेरिकी फौजया नियन्त्रणय् दु ।
Categorized in अन्तर्राष्ट्रिय
