कामिरिता शेर्पां २३क्वः खुसी विश्वया दकलय् तःजाःगु च्वापुगुँ सगरमाथा गयेत ताःलाःगु दु । थ्वया नापनापं कामिरिता न्हूगु कीर्तिमान नं दयेकादीगु दु ।

 

 

थौं बुधवाः सुथसिया ७ ताः जुयाः ५०गू मिनेटय् सगरमाथाया च्वकाय् थ्यंकाः वय्कलं दकलय् अप्वः सगरमाथा आरोहण यानादीम्हकथं विश्व कीर्तिमान तयादीगु खः । २३क्वः खुसी सगरमाथाया सफल आरोहण यानाः ४९दँ दुम्ह शेर्पां थःम्हेस्या दयेकातःगु कीर्तिमान त्वाःथलादीगु खः । शेर्पां थ्व स्वयां न्ह्यः २२क्वः तक सगरमाथा आरोहण यानाः विश्व कीर्तिमान तयादीगु खः ।

 

 

पर्यटन विभागया सम्पर्क अधिकृत मीरा आचार्यं कामिरितां सगरमाथाया सफल आरोहण याःगु पुष्टि यानादीगु खः । वय्कलं सेभेन समीट ट्रेक्स कम्पनीपाखें आरोहण यानादीगु खः । सोलुबुम्बुया कामिरितालिसें वाङ्दी शेर्पा व सुं सुं विदेशीतसें नं सगरमाथाया सफल आरोहण याःगु खः । 

 

 

कामिरिता थुगुसी विदेशी आरोहीया नितिं हाइ अल्टिच्यूड गाइड व लिडरया जिम्मेवारी कयाः सगरमाथा गयादीगु खः ।