२०८० चैत्र १५, बिहिबार

कारागारय् दुने हे लागू वास कारोवार जुइगु खुलासा, तःधंगु ल्याखय् लागु वासः ज्वन

थिंलागा तृतीया ११४२, पुस २१ बुधबाः

कारागारया कर्मचारी व जेल दुने हे दूपिं अपराधीया मिलेमतोस लागू वासः कारोबार जुइगु याःगु खुलासा जूगु दु ।

प्रहरीया  लागु वासः नियन्त्रण ब्युरोया टोलीं थौं कन्हय्  जक लागु वासः कारोबार याइपिं १७म्हसित ज्वनेधुंका अनुसन्धानय् उगु खँ खुलासा जूगु खः । ब्युरों येँया थी थी थासं ३ गू पुचःलय् ७ द्वः एम्पुल लागु वासः लिसें उमित ज्वंगु ब्युरोया प्रमुख प्रहरी बरिष्ठ उपरीक्षक हृदय थापां धयादील ।

कारोबारीतयेसं अप्वः ध्येबा कमे यायेत थिकेगु लागू वासः फेनारगनया एम्पुलय् नुर्फिननया लेबल टाँस याना मिइगु याःगु तकं अनुसन्धानं खुलासा जूगु दु । थथे याइबलय् मात्रा अप्वः जूवना लागू वासः सेवनकर्ताया थथें ज्यान वने फइगु जोखिम दूगु  ब्युरो प्रमुख थापाया धापू दु ।

भारतं  ८०तका ध्यबाय् खरिद याना हइगु लागू वासः थी थी तह पार याना प्रयोगकर्ताया ल्हातय् थ्यनिबलय् द्वःछि तक्क तुइगु याःगु लूगु दु । ३गू पुचःपाखें लूगु वासः वासः बजाः मू कथं २३गू लख ज्वलिन्ज्वःया जूगु ब्युरों न्ह्यथंगु दु ।

लागू वासःया हे मुद्दाय् दोषी ठहर जूम्ह सिन्धुली कारागारय् च्वनावःम्ह भारतीय नागरिक गुड्डु गुप्ताया योजनाय् जेल दुनं हे लागू वासःया कारोबार न्ह्यानावःगु व वयेकया नेतृत्वय् ८म्ह दुथ्यागु तकं प्रहरीया प्रारम्भिक अनुसन्धानं क्यंगु दु ।

दुथ्यापिं धाःपिं ८ म्ह मध्ये छम्ह सिन्धुली जिल्ला कारागारय् ज्या यानाच्वंम्ह ज्याकु ग्वहालिमि तकं जूगु पुष्टि जूगु खः  । अन ज्या यानाच्वंम्ह रिता सारु मगर हे कारागार दुने लागु वासः कारोबार यायेगु भूमिकाय् दूगु ब्युरों न्ह्यथंगु दु ।

उगु हे कारागारय् कैद भुक्तान यानाच्वंम्ह सन्तोष स्याङ्तान नं दुथ्यागु खनेदूगु प्रहरीं न्ह्यथंगृु दु । वयेक जिल्ला कारागारया टेलिफोन नाइके तकं खः ।

गुड्डु गुप्ताया योजनाय् उमिसं अवैध कारोबार यानाच्वंगु प्रहरीया दावी दु । गुड्डुयात २०६८ सालय् लागू वासः लिसें ज्वंगु खः ।

Categorized in अपराध