कार्तिक नाचया नितिं यल महानगरया १ करोड ग्वाहालि
शोभा श्रेष्ठ | थिंलागा दुतिया ११४०
यलया ऐतिहासिक कार्तिक नाचया संरक्षणया नितिं यल महानगरपालिकांं १ करोड तकाया ग्वाहालि याइगु जूगु दु ।
शनिबाः यलया कात्ति दबुलिइ जूगु ज्याझ्वःयात सम्वोधन यासें यल महानगरपालिकाया मेयर चिरिबाबु महर्जनं उगु ग्वाहालिया घोषणा यानादीगु खः । यलया मूर्त अमूर्त सम्पदाया संरक्षण व प्रवद्र्धन यायेगु लमपाया दायित्व दुने लाःगु धासें मेयर महर्जनं लिपाया आर्थिक वर्षय् कात्ति प्याखंया नितिं विशेष योजना दयेकेगु प्रतिवद्धता नं प्वंकादिल ।
कार्तिक नाच संरक्षण समितिं छगू ज्याझ्वः यासें थुगुसीया कात्ति प्याखंया औपचारिक समापन याःगु खः । उगु हे ज्याझ्वलय् नेवाः पत्रकार राष्ट्रिय दबूया नवनिर्वाचित केन्द्रीय कार्यसमितियात भिंतुना नं ब्यूगु खः ।
दबूपाखें न्ववासें मू छ्यान्जे सुनिल महर्जनं कात्ति प्याखं यलया जक मखु नेपाःया म्हसिका खःगु व थुगु प्याखं निरन्तर न्ह्याकावःगुलिइ प्याखंया कलाकार व सम्वद्ध सकसितं भिंतुना देछानादिल ।
मू छ्यान्जे महर्जनं जन प्रतिनिधि वयेधुंकाःस्थानीय मूर्त अमूर्त सम्पदा, परम्परायात ल्यंकातयेत स्थानीय सरकार न्ह्यज्यायेमाःगुलिइ बः बियादिल । स्थानीय सरकार बल्लायेधुंकूगु अवस्थाय् आः स्थानीय तजिलजि संरक्षणया नितिं सम्वन्धित खलः पुचलं चिन्ता कयाच्वनेमाःगु अवस्थायात न्हंकेत जनप्रतिनिधिपिन्सं ज्या यायेमाःगु महर्जनया धापू खः ।
ज्याझ्वलय् कार्तिक नाच संरक्षण समितिया नायः किरण चित्रकारं नेपाःया दक्कले पुलांगु निरन्तर न्ह्यानावःगु नाट्य परम्परा कात्ति प्याखं हे खःगु जानकारी ब्युसें थुकिया भविष्य सुनिश्चित यायेगु नितिं १० करोडया अक्षय कोषया नितिं ज्या यानाच्वनागु नं कनादिल ।
उगु हे ज्याझ्वलय् समितिया दुजः संजय शर्मा राजोपाध्यायं कात्ति प्याखं न्ह्याकेगु नितिं यमपा १६ वडापाखें बांलाक ग्वाहालि जुयाच्वंगु धासें १६ वडायात सुभाय् देछानादिल । यल लाय्कूलिसे स्वानाच्वंगु मेगु वडां धाःसा नापलायेत तकं थाकु चाःगु धासें नेपाःया तजिलजि ल्यंकेगु ज्याय् योगदान बीत नं छाय् न्ह्यचिले मफूगु धकाः उगु वडायात न्ह्यसः तयादिल ।
Categorized in राष्ट्रिय
