अमेरिकी ग्वहालि परियोजना, एमसीसीबारे सत्तारुढ गठबन्धनय् मतभेद जूगु दु ।

प्रधानमन्त्री व नेपाली कांग्रेसया सभापति शेरबहादुर देउवा एमसीसीयात संसदं अनुमोदन याकेगु पक्षय् खनेदु । उखय् नेकपा माओवादी केन्द्र व एकीकृत समाजवादी थुकिया विपक्षय् दु ।

थ्व विषयलय् ुसहलह यायेत प्रधानमन्त्री देउवां म्हिगः सत्तारुढ गठबन्धन व सर्वदलीय मुँज्या सःतूगु खः । सत्तारुढ दलतय्गु मुँज्याया सुरुइ हे प्रधानमन्त्री देउवां एमसीसीया नितिं मुँज्या सःतूगु धकाः धयादीगु खः ।

थ्वहेदथुइ वय्कलं एमसीसीयात थत्थें संसदं पारित याकेगुलिइ ग्वहालि यायेत धयादीगु खः । थ्वहेदथुइ एकीकृत समाजवादी व जनता समाजवादी पार्टीं थुकिइ थप सहलह यानाः न्ह्यज्यायेमाःगु विचाः तःगु दु ।

मुँज्याय् माओवादी केन्द्रया नायः पुष्पकमल दाहाल प्रचण्डं मध्यमार्गी विचाः तयादीगु खः । मुँज्याय् प्रचण्डं गठबन्धनयात कायम यानाः थ्व विषयलय् गू ढंगं एमसीसीयात सम्बोधन यायेफइ धइगु विषयलय् उपाय मालेमाःगु तर्क यानादीगु खः ।

सत्तारुढ दलदथुइ मतभेद जुइवं एमसीसी सम्झौताया विषयलय् सहलह यायेमाःगु बुँदात टिपोट यायेत ३म्ह दुजःया ज्यासना पुचः दयेकूगु दु । ज्यासना पुचलय् एकीकृत समाजवादीपाखें झलनाथ खनाल, कांग्रेसं सञ्चारमन्त्री ज्ञानेन्द्रबहादुर कार्की व माओवादी केन्द्रपाखें नारायणकाजी श्रेष्ठयात तःगु दु ।

Categorized in राष्ट्रिय