कालभैरवया बुसादँ क्वचाल
विकाश | कछलागा अष्टमी ११४०
थौं कछलागा अष्टमी येँया हनुमानध्वाखा लायकुलिइ दुगु कालभैरवया विधि कथं पूजा यासें कालभैरवया बुसादँ याःगु दु ।
थौंया दिं भैरवाष्टमी कथं कायेगु याः । भैरवाष्टमीया दिनयात हनुमानध्वाखाय् दुगु कालभैरव स्थापना याःगु दिंकथं नं कायेगु याः । व हे कथं थौंया दिंयात कालभैरवया ६सः व ५९क्वःगु स्थापना दिवस कथं नं हंगु दु ।
कालभैरवया बुसादँया झ्वलय् न्याम्ह गुरुपिनिपाखें तान्त्रिक विधिकथं होम नं याःगु खःसा निम्ह दुगु नं बलि ब्यूगु खः ।
तान्त्रिक विधि कथं कालभैरवया पूजा लिसें होम याःसा शनि, राहु, व केतु लिसेंया ग्रहदशाा चिलावनीगु जनविश्वास समाजय् दयाच्वंगु दु ।
काल भैरवयात महाःद्यःया उग्ररुप कथं नं कायेगु याः ।
थुगु कालभैरवया मुर्ति मल्लकालय् यमितयसं नागार्जुन पहाड उत्खनन यानाच्वंबलय् लुयावयाः येँया वसन्तपुलिइ हयाः स्थापना याःगु धयातःगु दु ।
मल्लकालया उत्तरार्धपाखे थुगु मूर्तियात तत्कालीन नेपाःया न्यायालय कथं काइगु खः । उगु इलय् थुगु कालभैरवया मुर्तिया न्ह्यःने अपराधीयात अपराध कबुले याकेगु याइगु खः ।
उम्ह संदिग्धं मखूगु लिसः बिल धाःसा थ्व हे मूर्तिया न्ह्यःने हि ल्ह्वयाः सी धइगु विश्वास थौंतक्क नं समाजय् ल्यं दनि ।
Categorized in राष्ट्रिय
