कालापानी–लिपुलेक क्षेत्र तकं कःघाना राष्ट्रिय जनगणना न्ह्याइगु
ञंलाथ्व तृतीया ११४१, भाद्र २४ बिहीवाः
राष्ट्रिय जनगणना वइगु कार्तिक २५ निसें मंसिर ९ गते तक्क जुइत्यंगु दु । कोरोना महामारीया हुनिं लिछ्यागु राष्ट्रिय जनगणना हाकनं न्ह्यायेत्यंगु केन्द्रीय तथ्याङक विभागं न्ह्यथंगु दु ।
सरकारं राष्ट्रिय जनगणना २०७८ कालापनी लिपुलेक क्षेत्रया नं जनगणना यायेगु धाःगु दु । थुगु क्षेत्र नेपाःया राजनीतिक नक्शाय् कःघाःगु तर भोगचलनया स्वामित्व वःगु मदुनि । उगु क्षेत्रय् थः याकःलं जनगणना यायेत असम्भव जूगुलिं ३गू हे तहया सरकारलिसे समन्वय याना भौतिक रुपय् मजूसा वैकल्पिक विधिं जनगणना यायेगु केन्द्रीय तथ्याकं विभागं न्ह्यथंगु दु ।
विभागं तयार याःगु न्हूगु ज्याधलः भदौ २१ गतेया मन्त्रिपरिषद् मुँज्यां स्वीकृत याःगु खः । विभागं थ्वखुसिइ ३९ द्वः गणक व ८द्वः सुपरीवेक्षकं थ्यंमथ्यं ७० गू लख छेँजः लिसें ३गू क्वःति जनसंख्याया गणना ज्या १५न्हू दुने क्वचायेकेत्यंगु दु ।
गणकया नितिं १२गू तगिं उत्तिर्ण व सुपरिवेक्षकया नितिं स्नातक तह उत्तिर्ण जुइमाः । कोरोना संक्रमणया जोखिम दूगुलिं स्वास्थ्य मन्त्रालय व मेगु निकायलिसे समन्वय जुयाच्वंगु विभागं न्ह्यथंगु दु । जनगणनाय् खटे जुइपिं गणकतयेत कोरोना भ्याक्सिन उपलब्ध याकेगु व स्वास्थ्य सुरक्षा मापदण्ड पालना यायेगु विभागं न्ह्यथंगु दु ।
छेँ ल्याः, भुखाचालिपा सरकारी अनुदानय् छेँ दयेकुगु मदयेकुगु व भवन दयेकुगुया आज्जु तकं संकलन याइगु जूगु दु । छेँजया दुजःया बैँक खाता दू मदूगु, प्रावधि शिक्षा लिसें तालिम काःगु मकाःगु व वैदेशिक रोजगारय् वंपिनि विस्तृत धलः नं संकलन याइगु जूगु दु ।
३गू हे तहया सरकारयात योजना तर्जुमा यायेत आवश्यक तथ्याकं जनस्तरय् वना कःघायेगु कुतः जुइगु केन्द्रीय तथ्याकं विभागं न्ह्यथंगु दु । जनगणना क्वचायेकेत ४ गू अर्ब ध्यबा लागत तुइगु अनुमान याःगु दु ।
Categorized in राष्ट्रिय
