काष्ठमण्डपया पुनर्निर्माणया नितिं येँ महानगरपालिकापाखें थप न्यागू करोड
काष्ठमण्डप पुनर्निर्माणया नितिं येँ महानगरपालिकां स्वंगूगु किस्ताया रकम न्यागू करोड तका काष्ठमण्डप पुनर्निर्माण समितियात लःल्हाःगु दु । थौं येँय् छगू ज्याझ्वः यासें समितियात उगु रकम लःल्हाःगु खः ।
 
ज्याझ्वलय् येँ महानगरपालिकाया मेयर विद्यासुन्दर शाक्यं वागमती प्रदेशया सांसद लिसें मरुसतः पुनर्निर्माण समितिया कजि राजेश शाक्ययात चेक लःल्हानादिल ।
 
नुगःखँ तयेगु झ्वलय् येँ महानगरपालिकाया मेयर शाक्यं ७२ सालया तःभुखाचं क्षतिग्रस्त याःगु येँया सम्पदायात पुलांगु हे स्वरुपय् लित हयेत छुं नं कुतः ल्यं मतयेगु धयादिल । महानगर दिवसय् येँया बाजं गुरुपिन्त नगद लिसें सम्मान यानागु लुमंकुसें मेयर शाक्यं येँया मूर्त अमूर्त सम्पदाया लागिं महानगरवासीलिसे पलाः न्ह्याकावनेगु प्रतिवद्धता नं प्वंकादिल । 
 
‘त्वाःबहाःया देगः, आखाछेँ, आगंछेँ वा विहार छुं नं जिर्णोद्धार वा पुनर्निर्माण यायेमाःसा जिमित धाःवल धाःसा जिमिसं यानाबीगु जुइ । थनया मूर्त अमूर्त सम्पदाया संरक्षण महानगरपालिकाया दायित्व खः । जिपिं थःगु दायित्वं लिचिलेमखु’ मेयर शाक्यया धापू खः । 
 
लिसें शाक्यं येँय् क्षतिग्रस्त सम्पदाया पुनर्निर्माणया लागिं महानगरपालिकाया हे श्रोतं गाःगु धासें याःसा थम्हं हे यायेफु धइगु प्रष्ट जूगु धयादिल । न्हापा सुयाकें ल्हाः मफ्वंसे ज्या यायेफइला धइगु शंका दुगु अवस्थाय् आः उगु शंका चिलावंगु दावी शाक्यं यानादिल ।
 
उकथं हे, येँ महागरपालिकाया उपमेयर हरिप्रभा खड्गी श्रेष्ठं ध्यबा जक दयां वा बियां नं मगाःगु धासें जिम्मेवार मनुखं थःगु जिम्मेवारी थुइकेमाःगु धयादिल । काष्ठमण्डप पुनर्निर्माणय् जुयाच्वंगु ज्यायात च्वछासें उपमेयर खड्गीं काष्ठमण्डप पुनर्निर्माणया कजि राजेश शाक्यलिसें पुचःयात नं सुभाय् देछानादिल ।
 
काष्ठमण्डप पुनर्निर्माण समितिया कजि व वागमती प्रदेशया सांसद राजेश शाक्यं वंगु २०७५ साल बैशाख १८ गते प्यम्ह वडानायःपिनिगु छगू कमिति गठन यायेधुंकाः निरन्तर ज्या न्ह्याकाच्वनागु खँ कनादिल । उकथं हे २०७५ साल जेष्ठ २९ गते महानगरपालिका व मरुसतः पुनः निर्माण समिति दथुइ छगू सम्झौता पत्र जूगु कथं न्हापांगु खुसि ५० लाख तका प्राप्त जुइ धकाः ज्या यायेगु हौसला दुगु नं वयकलं धयादिल ।
 
महानगरपालिकापाखें प्राप्त ध्यबां आःतक मरुसतःया आकार वये धुंकूगु व असार मसान्ततक करिब ३ करोड ५८ लाख मरुसतः दयेकेत खर्च जुइधुंकूगु जानकारी नं वय्कलं बियादिल ।
 
थप ५ करोड ध्यबा प्राप्त जूगुयात आः तत्काल सिँ व अप्पा न्यानाः न्हापांगु तलाया ज्या क्वचायेकेगु धासें निगूगु तलाया झ्याः तयेगु व माघया दुने हे मरुसतःया आकार जनमानसं खनिगु दावी शाक्यं यानादिल ।
 
संघीय सांसद कृष्णगोपाल श्रेष्ठं झीगु सम्पदा झीसं हे संरक्षण यायेफु धइगु काष्ठमण्डपया पुनर्निर्माणं प्रमाणित याःगु धासें थुगु हे कार्यकालय् काष्ठमण्डपया पुनर्निर्माण क्वचाःगु स्वयेखनीगु विश्वास नं प्वंकादिल ।
 
ज्याझ्वलय् काठमाडौं महानगरपालिका २३ वडाया नायः मचाराजा महर्जनं लसकुस यानादीगु खः ।
 
काष्ठमण्डप पुनर्निर्माणया नितिं समितियात येँ महानगरपालिकां थ्वयां न्ह्यः दक्कले न्हापां २०७५ ज्येष्ठ २९ गते न्हापांगु किस्ता कथं ५० लख तका उपलब्ध याकूगु खःसा निगूगु किस्ता कथं २०७५ असोज २७ गते ५ करोड तका उपलब्ध याकूगु खः ।
 
थौं स्वंगूगु किस्तावापत थप ५ करोडया चेक ब्यूगु खः ।