काष्ठमण्डप परम्परा शैलीं हे पुनर्निर्माण जुइगु
नृपेन्द्रलाल श्रेष्ठ | पोहेलागा चतुर्थी ११३९ (जनवरी २४ २०१९)
काष्ठमण्डप पुनर्निर्माण समितिं थौं छगु पत्रकार सम्मेलनयाना काष्ठमण्डप विर्नमाणया वइगु माघ १५ गतें प्यंगः थां थनेगु धका समितिया नायः प्रदेश न. ३ या सांसद राजेश शाक्यं जानकारी बियादीगु खः ।
येँ महानगरपालिकाया मेयर बिद्यासुन्दर शाक्यया निर्देशनय् कामनपा वडा न १९,२०, २३ व २४ या वडा अध्यक्षपिनिगु बिशेष पहलय् व स्थानीय पिनिगु ग्वाहालिं २०७५ बैशाख १८ गते प्रदेश न. ३ या सांसद राजेश शाक्यया अध्यक्षताय् काष्ठमण्डप पुनर्निर्माण समिति गठन जुगु खः । काष्ठमण्डप दयेकेत येँ महानगरपालिकां न्यागु करोड व न्यय्गु लाख आर्थिक ग्वाहालि याःगु खः ।
आः पुनर्निर्माण जुइ त्यःगु काष्ठमण्डप परम्परा शैली नाप परम्परा प्रबिधिं हे देयकेगु जुइ धका थौंया पत्रकार सम्मेलनय् जानकारी बिउगु खः ।
थौयागु पत्रकार सम्मेलनय् प्रा.सुदर्शन तिवारी,प्रेमनाथ जोशी अरुणा नकःमि व २३ वडा अधक्ष्य मचाराजा महर्जन पिन्स न काष्ठमण्डप पुनर्निर्माणया बिषय थःथःगु धारणा न्ह्यब्बःगु खः ।
