किपूमिया माग जायज खःगु मेयर शाक्यया धापू
शोभा श्रेष्ठ | चौलागा अष्टमी ११४०,बैसाख ६ गते
येँ महानगरपालिकाया मेयर विद्यासुन्दर शाक्यं किपुलिइ गर्भवती मिसाया बारे पिदंगु समाचारया खँय् किपूमिया माग जायज हे खःगु धयादीगु दु ।
छथासं मेथाय् वनेमालीबलय् क्वारेन्टाइनय् च्वनेमाःगु धकाः राज्यं हे परिपत्र जारी यानातःगु अवस्थाय् पिने जिल्लां वःपिं मनूतय्त क्वारेन्टाइनय् तयेमाःगु किपूमितय् माग पाय्छि हे खःगु मेयर शाक्यं धयादिल ।
वंगु चैत्र ३० गते आइतबाः किपुलिइ १०य् बालं च्वंम्ह छम्ह गर्भवती मिसायात छेँथुवालं जवर्जस्ती कोथां पितिंगु धकाः थीथी अनलाइन पोर्टलय् बुखँ पिदंगु खः ।
वागलुङ जैमिनि नगरपालिकायाम्ह गर्भवती देवी शर्मा व जाजरकोटय् अध्यापन याकावःम्ह वय्कःया जहान वैकुण्ठ शर्मा कोहलपुर अस्पतालं एम्बुलेन्सय् च्वनाः किपू थ्यंकःवःगु खः ।
किपुलिइ केहेँ वविता आचार्यं बालं कयातःगु कोथाय् इपिं च्वंवंबलय् महामारी न्यनाच्वंगु अवस्थाय् किपूमिपिन्सं उमित क्वारेन्टाइनय् तयेमाःगु माग तःगु खः ।
व धुंकाः स्थानीय वासीन्दा, प्रहरी प्रशासन व जनप्रतिनिधि समेतया पहलय् उमित त्रिभुवन विश्वविद्यालयस क्वारेन्टाइनय् तयेयंकूगु खः ।
थुगु घटनायात कयाः थीथी अनलाइन पोर्टलं बालं च्वंम्ह गर्भवती मिसायात छेँ थुवालं जवर्जस्ती पितिन धकाः बुखँ पिकाःगु खः ।
‘बुखँ पूर्वाग्रही व एक पक्षीय ढङ्गं च्वयातःगु खनेदु । लकडाउनया इलय् कोहलपुरं किपुलिइ वःपिन्त क्वारेन्टाइनय् च्वनेत धायेगु गलत मखु’ उपत्यका मेयर फोरमया कजि तकं खःम्ह कामपा मेयर शाक्यं धयादिल ।
स्थानीय सरकारं जिम्मेवारी कयाः व्यवस्थित रुपं क्वारेन्टाइनय् तयेयंकूगुलिइ नं एक पक्षीय ढङ्गं सामाजिक सद्भाव स्यंकीगु कथंया बुखँ पिथंगु धासें मेयर शाक्यं पत्रकारतयसं निष्पक्ष, सन्तुलित ढङ्गं सामाजिक सद्भाव दयेकातइगु कथं कलम न्ह्याकेत इनाप यानादिल ।
थ्व हे सम्वन्धय् किर्तिपुर नगरपालिका वडा १०या वडाध्यक्ष अमन महर्जनं नं विज्ञप्ति जारी यासें समाचारया खण्डन यानादीधुंकल ।
Categorized in राष्ट्रिय
