किपूया ज्याथःजिथिपि पोखरा भ्रमणय्
लहनान्युज | कछलाथ्व त्रयोदशी ११४० (नोभेम्वर १० २०१९)
किपू नगरपालिका वडा नम्वर ३ या ९० म्हः ज्याथःजिथिपिंत स्वक्वःखुसि सितिकं भ्रमण यंकूगु दु ।
किपू नगरपालिका वडा नम्वर ३ या ग्वसालय् दँय्दसं अथे धार्मिक व साँस्कृतिक भ्रमण यंकाच्वंगु खःसा स्वन्हुया लागि पर्यटकिय व धार्मिक स्थल पोखरा भ्रमणया यंकुगु खः ।
किपू नगरपालिकाया मेयर रमेश महर्जन, उपमेयर सरस्वति खड्का रिजाल, वडा नम्वर ३ या अध्यक्ष राजेन्द्र महर्जन, वडा १ या अध्यक्ष हर्ष महर्जन नाप वडा ९ या अध्यक्ष गंगाराम महर्जनपिंसं खादां क्वखायेका, सिन्हःतिकाः विदाइ याउगु खः ।
उगु पुचःयात बिचाःयायेत स्वास्थ्यय् प्यम्हलिसें नीम्ह स्वयम् सेवकत नाप प्यंगः बसय् पोखरा, छाब्दी बाराही देगः दर्शनयाका लिहाँवइगु ग्वसाःखलकं जानकारी ब्यूगु दु । लुमंकेबहःजु थ्वयां न्ह्यः लुम्बिनी, मनकामना व जानकी मन्दिरय् चाःहिका हयेधुंकूगु खः ।
किपाः ज्ञानकुमार महर्जन
