किपूया बुँख्याः ब्याण्डं न्हापांगु म्यूजिक भिडियो
..जिमि बाज्यां धाःगु थौं छ्वय्ला बजि नयेगु दिन, भुतुलिइ सु दुयाः थौं छ्वय्ला छुइगु दिन । मल्ता चि हाः यानाः चिकं क्वयेकाः झ्वाँय् याना, मूसःगु अय्लाःनाप नल नल नल छ्वय्ला बजि...।
 
किपूया बुँख्याः ब्याण्डं नं न्हापांगु म्यूजिक भिडियो कथं ...छ्वय्ला बजि... मेटल संगीतपाखें समाजय् ब्वलनाच्वंगु यथार्थ परिवेश व सामाजिक चित्रणयात ब्यंग्य यानातःगु दु ।
थुगु नेपालभाषा म्ये संगीत ख्यलय् न्हूगु प्रयोग कथं युवापुस्ता दथुइ पिहा वयेत्यःगु म्ये ख । 
 
थुगु मेटल म्ये ...छ्वय्ला बजि...वइगु सेप्टेम्बर १ मंगलवाः बुँख्याःया यूट्युब च्यानलपाखें सार्वजनिक जुइत्यःगु ख
 
म्ये मेटल, म्यूजिक भिडियोया सम्पादन, कलर एनिमेटर राजेश शाक्यं यानादिगु खः । शाक्यं थुगु म्येया म्यूजिक भिडियो मचांनिसें बुरातकं नं लोकह्वाइ धका लहनान्युजयात धयादिगु खः ।
 
अथेहे, बुँख्याः ब्याण्डया ब्याण्ड म्यानेजरलिसें म्यूजिक भिडियोया व्यवस्थापक सुबन जोशीं नेवाः समाज दुने बांलाःगु पक्षत आपालं दूगु व उगु बांलाःगु पक्षय् नं नकारात्मक लिच्वः लाइगु
कथं परम्परा व चलनयात कःघाये हे माःगु यथार्थतायात थुगु म्यूजिक भिडियों कुतः यानागु जानकारी बियादीगु दु ।
 
आपालं स्टेजय् कन्सर्ट बिइधुंकूगु बुँख्याः ब्याण्ड मेटल संगीत ख्यलय् लोकंह्वाःगु ब्याण्ड खः । थुगु ब्याण्डय् आः निर्गमन महर्जन भोकलिष्ट व गितारिष्टया रुपं दुसा सजिव महर्जन ड्रमय्, अनिल महर्जन बास गितारय् व सुवन जोशी ब्याण्ड म्यानेजरया रुपं दु ।
 
थुगु म्यूजिक भिडियोय् दिपु कुमार महर्जन, गणेश रोजर्स व सम्राट महर्जनपिन्सं सिनेम्याटोग्राफरया भूमिका म्हितादीगु खःसा मेकअप आर्टिष्टया रुपं सोफी गुरुंग व शान्ति गुरुंगं भूमिका म्हितादीगु दु । व्यवस्थापनया भाला सुवन जोशी व विजेन महर्जनं यानादीगु थुगु म्येया निर्देशन निर्गमन महर्जन व सम्पादनलिसें कलर एनिमेशन राजेश शाक्यं यानादीगु दु ।
Categorized in मनोरन्जन