किपू नगरपालिकां ८द्वः परिवारयात राहत इन
शोभा श्रेष्ठ | बछलागा दुतिया ११४०,बैसाख २६ गते
किपू नगरपालिकां न्ह्यानाच्वंगु लकडाउनया इलय् पिनं वयाः किपुलिइ च्वनाः अध्ययन यानावःपिं विद्यार्थीयात राहत ब्यूगु दु ।
किपू नगरपालिकाया मेयर रमेश महर्जनं आः न्ह्यानाच्वंगु लकडाउन ई दुने १५सःम्ह विद्यार्थीतयत किपू नगरपालिकाया हे आन्तरिक बजेटपाखें राहत ग्वाहालि यानागु जानकारी बियादीगु दु ।
किपुलिइ च्वनाः ब्वनाच्वंपिं सुं नं विद्यार्थी सुं हे द्यांलानाः च्वनेम्वाःलेमा धइगु खँय् विशेष ध्यान बियागु किपूया मेयर महर्जनं धयादिल ।
संचारकःमितलिसेया खँल्हाबल्हाया झ्वलय् मेयर महर्जनं किपू नगरपालिकाय् च्वनाच्वंपिं विपन्न ज्यालम मजदुरी यानाः नयेमाःपिं ८द्वः परिवारयात राहत बी धुनागु कनादिल ।
कोरोना संक्रमण रोकथाम व नियन्त्रणया खँय् लिसें किपू नगरपालिकां यानावःगु ज्याया जानकारी कायेत नेवाः पत्रकार राष्ट्रिय दबूया केन्द्रीय न्वकू नृपेन्द्रलाल श्रेष्ठ, मू छ्याञ्जे सुनिल महर्जन, केन्द्रीय दांभरिं सुरेन्द्रभक्त श्रेष्ठलिसे नेवाः एफएम १०६.७ या प्रबन्ध निर्देशक बीरेन्द्र विनु शाक्य विविशा, किर्ति अनलाइनया म्यानेजिङ्ग डिरेक्टर प्रताप महर्जन व ज्वजलपा वाःपौया प्रकाशक नजरराम महर्जन किपू नगरपालिकाया ज्याकू थ्यंगु खः ।
धात्थें आपतय् लाःपिं मनूतयत राहत उपलव्ध याकेत थःपिन्सं स्थलगत अध्ययन यानाः हे राहत बीगु यानागु जानकारी नं मेयर महर्जनं बियादीगु दु ।
मेयर महर्जनं किपू नगरपालिकाय् कोरोना संक्रमित सुं हे मदुगु व संक्रमित दुहांवयेफुगुपाखे नं बिचाः यानाः सचेतता नालागु धयादिल ।
थ्व सवन्धमा जःलाखला नगरपालिकात दक्षिणकाली नगरपालिका व चन्द्रागिरि नगरपालिकालिसे समन्वय यानाच्वनागु मेयर महर्जनया धापू दु ।
‘किपू नगरया सीमाना धैगु हे दक्षिणकाली व चन्द्रागिरी नगरपालिका खः । दक्षिणकाली व चन्द्रागिरी नगरपालिकां सीमानाकाय् कडाइ यात धाःसा किपू नगरपालिकायात छुं समस्या वइमखुु’ मेयर महर्जनं धयादिल ।
मेयर महर्जनं लकडाउन झन् झन् ताःहाकयावंगु इलय् किपू नगरया जनसमुदाययात मग्यासें सचेत व सतर्क जुयाः कोरोना भाइरसया सामना यायेत इनाप यानादिल । लिसें नेपाल सरकारं घोषणा यानातःगु लकडाउनयात पूर्ण रुपं पालना यायेत नं वयकलं आह्वान यानादीगु दु ।
