किपू नगरपालिकापाखे भू—सेवा केन्द्र सञ्चालन याइगु
नृपेन्द्रलाल श्रेष्ठ | गुंलागा ३ ११४०,साउन २२ बिहीवाः
किपू नगरपालिकां आः भू—सेवा केन्द्र स्थापना याना सञ्चालन जुइ त्यःगु दु । थुकिया सम्बन्धी अनुमति पत्र साउन २१ गते बुधवाः मालपोत अधिकृत कलंकीया प्रमुख श्री टेकराज अर्यालं किपू नगरपालिकाया मेयर रमेश महर्जनयात हस्तान्तरण याःगु दु ।
मालपोत नियमावली, २०३६ नियम २३ क बमोजिम भू–सेवा केन्द्र सञ्चालन यायेत किपू नगरपालिकायात अनुमति पत्र लल्हाःगु खः । मालपोल कार्यालय कलंकीं भू—सम्बन्धी छेँय्, जग्गा पास, नामसारी, फुकुवा थे जाःगु ज्या आः ईन्टरनेटपाखे जुइगु जुगुलि थज्यागु ज्या अपुकेत लागि स्थानीय सरकार (नगरपालिका) थ्व सेवा सञ्चालन याये त्यःगु खः ।
थुकिया लागि सेवाग्राहीं थःत माःगु सेवाया लागि नगरपालिकाय् निवेदन बिइ माःगु व उकिया आधारय् निश्चित शुल्क कया नगरपालिकां दक्को विवरण भरे याना उकिया प्रिन्ट (टोकन) उपलब्ध याना बिइ ।
उगु प्रिन्ट (टोकन) कया तपिकं मालपोत कार्यालय कलंकी वना थःगु ज्या याये फइ । थुगु ज्यायाना सेवाग्राहीपिनिगु ई व ध्यवा तक बचे जुइ धका धाःगु दु ।
उगु ज्याझ्वलय् किपू नगरपालिकाया उप–प्रमुख सरस्वती खड्का, नि.प्र.प्र.अ. टंकलाल गैरे, ले.अ.(कलंकी मालपोत) तारा प्र. पोखरेल, क.अ. (कलंकी मालपोत) केशव खतिवडा, ले.अ.(की.न.पा.) मित्र प्रसाद घिमिरे, शा.अ. (की.न.पा.) जनक थापा, ई. (नक्सा शाखा, की.न.पा.) सुरज ओझा, सु.प्र.अ.(की.न.पा.) परशुराम चौलागाई तथा ना.सु.(की.न.पा.) दिलमाया कुँवर पिनिगु न उपस्थिति दुगु खः ।
