कुपण्डोलय् अलग क्षमताया चित्रकला प्रदर्शनी
राजेश बज्राचार्य | ने. सं. ११३८ थिंलागा पारु (डिसेम्वर ५, २०१७) यल
दयँदसं डिसेम्वर ३ तारिखया दिनसं हनिगु विश्व अपांग दिवसया लसताय् ३न्हूयंक छगु चित्रकला ब्वज्या नं जूगु दु ।
अन्तर्राष्ट्रिय रेडक्रसया आंशिक ग्वाहालिइ राष्ट्रिय शारिरीक अपांगता संघया ग्वसालय् श्रृजनशील हातहरु शीर्षकय् थुगु चित्रकला ब्वज्याः जूगु खः । संघयालागि कलाकार संजय बान्तवाया कजिसूइ जूगु चित्रकलास ब्वज्याय् २५दँ निसें ४५दँ या थी थी शारिरीक अपांगता बावजूद कला क्षेत्रय् न्ह्यज्यानाच्वंपि ७म्ह कलाकारपिनिगु ४०गू चित्रकला प्रदर्शनी जूगु खः ।
ज्याझ्वःपाखें सबिता सेन (चेत कुमारी), केश बहादुर गुरुंग, लक्ष्मी भासिम नापं कलाया स्वपलाःया संस्थापक कलाकारपिं सुन्दर श्रेष्ठ, मनिष महर्जन, रमेश बाराही लगायत ४५दँया कुमार तामांगया व्यवसायिक चित्रकला प्रवद्र्धनय् ग्वाहाली जुइगु ग्वसाःखलःया धापू दु ।
कलाया स्वपलाःपाखें कलाकार मनिष, सुन्दर व रमेशया सामूहिक धापूकथं अपांगता समस्यापाखे मिखा ब्वयेगु सिबें कलाकारिताया मूल्यांकन यायेफःसा समाजय् ह्यूपा वइ । अथेहे, भक्तपुर ईंग्लिस स्कूल व माउन्ट स्नाइ स्कूलया चित्रकला प्रशिक्षक लक्ष्मी भाषिम कलाया निरन्तरता रोजगारीपाखें दैगुलिइ बिश्वस्त जुयादी । मेम्ह कलाकार केश बहादुर गुरुंग २०७२ सालया तःभूखाया इलय् ओक्सफामया स्वंयसेवक कथं गोरखाय् ग्वाहाली यानाच्वंबलये थः स्वयं घाइते जुया ब्हीलचेयरया सहायता कायेमाःगु जुवंगु खः । मेपिनिगु सहायतां जक म्वायेगु सिबें वयेकलं चित्रकला सयेका थुगु पेशापाखें हे स्वावलम्वी जुया म्वायेगु मनतुनांच्वनादीगु दु ।
२६दँ न्ह्यःनिसें देय्दँसं विश्व अपांग दिवस हनेगु ज्यापाखें अपांगताप्रति सामाजिक व्यवस्था हलिन्यंक सुधार जुयाच्वंगु दु । नीतिगत व्यवस्था अनुसार सामाजिक व्यवहार विशेषतः नेपालय् अझ नं विभेदपूर्ण जूगुलिं अपांगता समस्या बावजूदया थुमिके दुगु विशेष क्षमताया पहिचान जुइमफूगु थुगु क्षेत्रया अभियन्तापिनिगु धापू दु । थुजोगु मू हुनिंयात न्हंकेत थुगुसीइ सकसियानितिं दीगो व समतामूलक समाजया रुपान्तरण धैगु नारासहित हलिन्यंक अपांगता दिवस हनेगु ज्या जुयाच्वंगु दु ।
