केएमसी अस्पताल कोरोना संक्रमण छम्ह सीत
लहनान्युज | दिल्लागा षष्ठी ११४०,असार २७ शनिवाः
केएमसी अस्पताल सिनामंगलय् कोरोना संक्रमणम्ह छम्ह सीगु पुष्टि जूगु दु ।
गोकर्णया ५४ दँ दुम्ह उम्ह मिजंम्ह उपचारया झ्वलय् २५ गते सीगु खः । असार २६ गते वयागुु पीसीआर परीक्षण रिपोर्ट पोजेटिभ वःगु धका अस्पतालया निर्देशकं जानकारी बिःगु दु ।
थ्व नाप नेपालय् कोरोना संक्रमण जूया सीपिनिगु ल्याः ३६म्ह थ्यःगु दु ।
उम्ह मनू जँलास्येँया ल्वगि खः । स्वास्थ्यय् समस्या वयेवः वयात वःगु असार १९ गते त्रिवि शिक्षण अस्पताल महाराजगञ्ज यंकूगु खः वयात केएमसी रिफर याःगु खः । श्वासप्रश्वासया तक समस्या वयेवः केएमसीया भेन्टिलेटरय् तया वासः याका च्वंगु खः ।
कोरोना संक्रमण जूगु मजूग धका सिइकेत २१ गते वयागु स्वाबया नमूना संकलन याना परीक्षणया लागि छुवःगु खः । तर, वयागु रिपोर्ट मवयेवः २५ गते सीगु खः । उम्ह मनू सीगु कन्ह्य कुन्हु हे वयागु रिपोर्टय् कोरोना संक्रमण खने दुगु धका धाःगु खः ।
नेपाली सेनां वयागु शनिवाः सुथय् वयागु शव व्यवस्थापन याःगु खः ।
