केपी ओली हाकनं प्रधानमन्त्री जुइगु पक्का
लहनान्यूज | कछलाथ्व द्धितीया ११४१,बैसाख ३० बिहीवाः
संविधानया धारा ७६ या २ कथं बहुमतया सरकार निस्वनेगु कुतः याःगु विपक्षी दल नेपाली कांग्रेस व माओवादी केन्द्रं बैकल्पिक सरकार गठनया सम्भावना क्वःचागु निष्कर्षय् थ्यंगु दु ।
थौं न्हिनय् च्वंगु नेपाली कांग्रेस पदाधिकारी बैठक व उगु हे ईलये च्वंगु माओवादी केन्द्रया स्थायी कमिटी मुँज्यां बैकल्पिक सरकार गठनया सम्भावना क्वःचागु निष्कर्षय् थ्यंगु खः । पदाधिकारी बैठकय् सभापति शेरवहादुर देउवां जसपाया महन्थ ठाकुर व राजेन्द्र महतोयात न्हूगु सरकार गठनया नितिं माने याये मफुसेंलि उगु निर्णयस थ्यंगु खः ।
अथेहे माओवादी केन्द्रया स्थायी कमिटी मुँज्यां नायः पुष्पकमल दाहालं न्हूगु सरकार गठनया सम्भावना मदुगु जानकारी बियादिल । न्हूगु सरकार गठनया नितिं कांग्रेस व माओवादी केन्द्रं जसपाया ठाकुर व महतो पक्षपिन्त माने यायेत असफल जूगु खः ।
लिपाः नेकपा एमालेया माधव नेपाल पक्षपिन्त नं न्हूगु सरकारया नितिं आह्वान यानादिगु खः । तर निगू विकल्प हे अन्त्य जुसेंलि बहुमतया सरकार गठनया सम्भावना क्वचाःगु खः ।
बुहमतिया सरकार गठनया सम्भावना मदये धुंका आः संविधानया धारा ७६ या उपधार ३ कथं प्रतिनिसभाया दकले तःधंगु दलया नेताया हैसियतं हाकनं केपी ओली हे प्रधानमन्त्री जुइगु पक्का जूगु दु ।
