अनसन च्वनाच्वंम्ह प्रा. डाक्टर गोविन्द केसीया प्रतिनिधि व सरकारी पक्ष दथुइ जूगु वार्ता थौं निन्हुया दिनस नं बिना निष्कर्ष क्वचाःगु दु ।

सिंहदरवारय् च्वंगु शिक्षा मन्त्रालयस जूगु सहलहस डाक्टर केसीया मू माग त्रिभुवन विश्वविद्यालय चिकित्सा शास्त्र अध्ययन संस्थान आइओएमया डीन केशवप्रसाद सिंह व त्रिविविया उपकुलपति तीर्थ खनियाया बर्खास्तीया बुँदायात कयाः सहलह जूगु खःसा वार्ता निष्कर्षय् थ्यने मफूगु खः । सरकारी वार्ता पुचलं निम्हेसिगु नियुक्ति व पद नियमकथं जूगुलिं बर्खास्त यायेमफइगु धाःगु सीदुगु दु । थौंया वार्ताय् डाक्टर केसीं तयातःगु मेमेगु च्यागू मागयात कयाः सहलह मजूगु सोलिडारिटी फर डाक्टर केसी अलाइन्सया डाक्टर जीवन क्षेत्रीं जानकारी बियादीगु दु । 

सरकारी वार्ता पुचलय् शिक्षा सचिव शान्त बहादुर श्रेष्ठ व स्वास्थ्य सचिव डाक्टर सेनेन्द्रराज उप्रेती अथेहे केसी पक्षपाखें डाक्टर योगेन्द्र प्रसाद सिंह, प्रा.डा. राजेन्द्र वाग्ले, रेजिडेण्ट डाक्टर्स एशोसियशनया नायः लिजन महर्जन, डा. रञ्जन सापकोटा, डा. जीवन क्षेत्री व डा. सागर पोखरेलं ब्वति कयादीगु खः ।