कैदीबन्दीतयत उद्यमी दयेकेत सम्झौता
लहनान्यूज | चौलाथ्व एकादशि ११३७ (मार्च ७ २०१७)
जेलय् दुपिं कैदीबन्दीत समाजय् लिहां वयेधुंकाः इमित सक्षम उद्यमी दयेकेत सम्झौता जूगु दु ।
जेलय् लानाच्वपिं मिसा कैदीवन्दीया ग्वाहालिया नितिं थौं यलय् लिडिङ वूमेन एशोसियन, सजेना क्राफ्ट र राष्ट्रिय उपभोक्ता मञ्चया मंकाः ग्वसलाय् जूगु ‘नेवाः सांस्कृतिक ज्याझ्वः व झ्वःभ्वय्’ ज्याझ्वलय् थुगु सम्झौता जूगु खः । थुगु दँय् जेलमुक्त जूपिं ३० कैदीबन्दीयात सक्षम उद्यमी दयेकेत आवश्यक तालिम व मेगु ग्वाहालि बीगु न्हापांगु झ्वःया सम्झौताय् उल्लेख दु ।
नेपाल घरेलु तथा साना उद्योग महासंघं लिडिङ वूमेन एशोशिएसनलिसेया सहकार्यय् थुगु सम्झौता कथंया ज्या यायेगु न्ह्यथंगु दु । महासंघया पाखें न्वकू शोभा गुरुङ व एशोसियसनया पाखें जानकी प्रधान श्रेष्ठं सम्झौतापतिइ ल्हाःचिं तःगु खः ।
थौं हे ज्याझ्वःया मूपाहां नेपालया लागिं जापानी राजदूत महामहिम माशासी ओगावाया बुदिं लाःगुलिं वयकःयात नेवाः परम्परा कथं ख्येँय् सगं नं ब्यूगु खः । मू पाहां महामहिम ओगावां ज्याझ्वलय् वयाः थः तसकं लयताःगु धासें ग्वाहालि यायेत थः तयार दुगु धयादिल ।
ज्याझ्वलय् नख्खु कारागारया कैदीबन्दीं दयेकूगु थीथी ज्वलंया लिसें पेडीक्याब (आधुनिक रिक्सा)या नं ब्वज्या याःगु खः । लिसें ललितपुर महानगर दुने २० मिसातयत पेडिक्याब न्ह्याकेगु तालिम बियाः न्ह्याकेबीगु योजना बारे नं ज्याझ्वलय् जानकारी ब्यूगु खः ।
पाटन म्यूजियमय् जूगु सांस्कृतिक ज्याझ्वलय् रुद्राक्ष ब्याण्डया मिलन तण्डुकार, इश्वर जोशी, मिलेश तण्डुकारपाखें जलतरंग, स्वजन रघुवंशी, शर्मिला महर्जन, सजिना महर्जनं महामञ्जुश्री, बज्रयोगिनी, कुमारी हुलाप्याखंया लिसें भैरव काली चर्या व धिमे लिसेंया सांस्कृतिक हुलाप्याखं, ११दँया ट्युलिप श्रेष्ठ व ६दँया सजेना चित्रकारं हुलाप्याखं न्ह्यब्वःगु खः । अथे हे सुरजवीर बज्राचार्यं ‘ग्यानापू स्टाइल’ म्ये न्ह्यब्वःगु खः ।
ज्याझ्वलय् यल जिल्लाया प्रमुख जिल्ला अधिकारी दिपक काफ्ले, यल प्रहरी प्रमुख प्रहरी वरिष्ठ उपरीक्षक ठूले राई, यल महानगरपालिकाया प्रमुख कार्यकारी अधिकृत हरिप्रसाद दाहाल, नख्खु कारागार प्रमुख टेकबहादुर के.सी., नेपालयालागि अमेरिकी राजदुतावासया प्रवक्ता ईनका स्टोनह्याम, द्वारिकाज होटल्स एण्ड रिसोर्टसया नायः अम्बिका श्रेष्ठ, इन्टरनेशनल कन्सर्न सेन्टरया प्रमुख प्रा.डा. अन्जान शाक्य, यल उद्योग वाणिज्य संघया नायः सविन श्रेष्ठ लिसें नं भिंतुना न्वचु बियादीगु खः ।
नेवाः परम्परा कथं ह्याउँ सिन्हः कोखा, व तुच्चालिसें न्ह्याःगु ज्याझ्वलय् लिडिङ वूमेन एशोसिएसनया नायः जानकी प्रधान श्रेष्ठं लसकुस यानादिल सा राष्ट्रिय उपभोक्ता मञ्चया नायः प्रेमलाल महर्जनं सुभाय् देछानादिल । ज्याझ्वः नेवाः झ्वः भ्वयलिसें क्वचायेकूगु खः ।
Categorized in मनोरन्जन
