कोपा अमेरिका कप अर्जेन्टिनाय् जक जुइगु
कछलाथ्व एकादशी ११४१,जेष्ठ ८ सनिवाः
थुगुसीया कोपा अमेरिका कपया दक्वः कासाः अर्जेन्टिनाय् जक जुइगु जूगु दु ।
कासा न्ह्याइगु ई न्ह्यःने वसेंलि सहआयोजक देय् कोलम्बियाय् राजनीतिक अशान्ति ब्वलनाच्वंगु हुनिं दक्षिण अमेरिकी फुटबल फेडेरेसनं कोपा अमेरिका कप अर्जेन्टिनाय् जक यायेगु निर्णय याःगु खः ।
थ्वसिबेन्ह्यः फेडेरेसनं अर्जेन्टिना व कोलम्वियाय् यायेगु निर्णय याःगु खः । निगू देशय् यायेगु जूसां कोलम्वियाय् अप्वयावंगु अशान्ति लिपाः फेडेरेसनं छवा तक्क अनया अवस्थाबारे न्यनेकने जूगु खः ।
१०५दँया इतिहासय् कोपा अमेरिका न्हापांखुसी निगू देशय् जुइगु जूगु खः । तर कोलम्बियाय् न्ह्यानाच्वंगु आन्दोलनया हुनिं अर्जेन्टिनाय् जक जुइमाःग्ु आयोजक धाःगु दु । कोपा अमेरिका जुन १३ निसें १० जुलाई तक्क जुई ।
१५गू कासाः कोलम्बिया यायेगु धलः सार्वजनिक जूगु खः । गुकिइ फाइनल कासा नं कोलम्बिया हे जुइगु धलः पिहाँवःगु ख । तर अनया द्वन्द्वया हुनिं आः दक्व कासाः अर्जेन्टिनाय् जक जुई ।
कासाय् १२गू टोलीया ब्वति दइगु जुसां नं अष्ट्रेलिया व कतारं ब्वति मकाइगु जूगु दु । ब्वति दूगु टोलीपिं पुचः ‘ए’ लय् अर्जेन्टिना, बोलिभिया, उरुग्वे, चिली व पाराग्वे लाःगु दु ।
अथेह पुचः ‘बी’ लय् कोलम्विया, ब्राजिल, भेनेजुएला, इक्वेडर प पेरु लाःगु दु । निगुलिं पुचःया शीर्ष प्यंगु टोलीं क्वाटरफाइनलया यात्रा तय याइ ।
Categorized in कासा
