इंग्लीश प्रिमियर लिग फुटबलय् आर्सनलं लिड्स युनाइटेड ४गू–१गूया गोल अन्तरं बुकुगु दु ।

लिड्सया मैदानय् जूगु कासाय् भ्रमणकारी टोली आर्सनलयात त्याकाबिइत ग्याब्रियल मार्टीनेलीं निगू गोल याःबलय् बकायो साका व एमिले स्मीथ रोवें छगू गोल थप याःगु खः । बूगु टोली लिड्स युनाइटेडया राफिन्हां छगू गोल याःगु खः ।

प्रिमियर लिग अन्र्तगत म्हिगः जुइमाःगु मेगु ६गू कासात धाःसा कोभिडया हुनिं लिछ्यागु दु । कासामि लिसें पदाधिकारीइ कोरोना संक्रमण खनेदयेधुंका म्यान्चेस्टर युनाइटेड व ब्राइटन, एस्टन भिल्ला व बर्न्ले, साउथह्याम्पटन व ब्रेनफोर्ड, वाट्फोर्ड व क्रिष्टल प्यालेस लिसें नरिच सिटी व वेष्ट ह्याम युनाइटेड दथुया कासा कोभिडं रद्द जूगु खः ।

प्रिमियर लिग जक मजुसें इंग्ल्याण्डया मेगु फुटबल धेंधेंबल्ला नं कोभिडया हुनिं लिछ्यागु दु । थुगु वालय् जुइमाःगु थी थी  तहया फुटबल लिगया मेगु १९गू कासा नं रद्द जूगु दु ।

Categorized in कासा