कोभिड १९ निगरानी प्रणाली आः प्ले स्टोरय्
नृपेन्द्रलाल श्रेष्ठ | चौलाथ्व १३ ११४०
कोरोनाभाइरस (कोभिड १९) या सम्भावित महामारिया रोकथाम व निगरानी यायेगु लागि येँं महानगरपालिकाया पहलय् दयेकूगु कोभिड १९ निगरानी प्रणाली मोबाइल एप आः प्ले स्टोरपाखें डाउनलोड यायेफइगु जूगु दु ।
कामपाया समन्वयस नेपाल रिसर्च एजुकेशन नेटवर्क, जनस्वास्थ्य सरोकार ट्रष्ट, इनोभेटिभ सोलुसन, नेपाल डिजास्टार–इमर्जेन्सी मेडिसिन सेन्टर लिसेंया संघसंस्थाया साझेदारिं दयेकूगु थुगु निगरानि प्रणाली आः ‘प्ले स्टोर’य् उपलब्ध जूगु खः ।
निगरानी प्रणालीया थुगु एप प्लेस्टोरय् उपलब्ध जूगु लिसें थःगु स्वास्थ्य अवस्थाया आधारय् कोभिड १९ संक्रमणया सम्भावना थम्हं हे मोबाइलपाखें स्वयेफइगु जूगु दु ।
उकिया नापं महानगर दुने न्ह्याम्हेसिनं नं थः गुलित सावधानज जुइमाःगु खः, छेँय् च्वना हे सुरक्षित दु वा अस्पताल वने माः, बिशेषज्ञ स्वास्थ्य सेवा आवश्यक दु वा मदु थेंज्याःगु थःगु स्वास्थ्य सम्बन्धी अवस्थाया जानकारी मोबाइल एपपाखें कायेफइ ।
‘नेपाल कोविड–१९ निगरानी प्रणाली’ प्रणालीपाखें मू प्यताजि ज्या कायेफइगु धाःगु दु ।
यूजरं जायेकूगु जानकारी व लक्षणया आधारं कोरोना संक्रमणया स्वमूल्यांकन यायेफइसा स्वमुल्यांकन मार्फत सम्भावित लक्षण खनेदुपिं मनूतयत तुरुन्त चिकित्सकपिन्त फोन सम्पर्क याना सहलह नं ।
थुकिया स्वंगूगु ज्या धइगु स्वमूल्यांकन अले फोन परामर्श लिपा ल्वयया सम्भावनन दुपि मनूतयत एम्वुलेन्सया व्यवस्था याना खै व स्वाव परिक्षणया लागि तोकेयाःगु अस्पताल यंकेगु ज्या नं याइ ।
उकिया नापं भौगोलिक सूचना प्रणालीया माध्यम सम्वन्धित निकाययात संक्रमण नियन्त्रणया लागिं माःगु थप उपाय नालाकायेगु लागिं नं थुगु हे डिजिटल प्रणालीं ग्वाहालि याइ ।
आःयात थुगु प्रणाली येँं महानगरपालीकाय् पुर्ण रुपं लागू जुइ । तर, महानगरपालि पिनेया पिन्सं नं थःगु स्वास्थ्य अवस्थाबारे जानकारी कायेत थुगु एप छ्यलेफइ ।
थीथी कथं थनया अवस्थायात ट्र्याक यानाः माःगु पलाः छीगु नितिं योजनाय् ज्या जुयाच्वंगु इलय् थुगु डिजिटल प्रणालीपाखें तःधंगु ग्वाहालि जुइफइगु आशा याःगु दु ।
येँ महानगरपालिकां सकसित थुगु एप डाउनलोड यानाः थःगु विवरण जायेकेत इनाप नं याःगु दु ।
Categorized in राष्ट्रिय
