कोभिड १९ रोकथामय् गोदावरी नगरपालिकाया सक्रियता
नृपेन्द्रलाल श्रेष्ठ | चौलाथ्व पञ्चमी ११४०,चैत्र १६ गते
हलिंन्यंक न्यनाच्वंगु कोरोना भाइरस कोभिड १९ नेपालय् न्यंकेमबीगु नितिं थीथी थासय् थीथी कथंया तयारी जुयाच्वंगु दु । थ्व हे झ्वलय् गोदावरी नगरपालिका नं थुगु तयारीइ सक्रिय जूगु दु ।
लहनान्यूजलिसे खँ ल्हासें गोदावरी नगरपालिकाया मेयर गजेन्द्र महर्जनं नगरपालिका दुने १० बेडया वाइसोलेसन वार्ड दयेकागु जानकारी बियादिल । लिसें स्थानीय निगू स्कूल व छगू अस्पतालय् क्वारेन्टाइया व्यवस्था यानागु नं कनादिल ।
नगरपालिका दुनेया १४गुलिं हे वडाय् हेल्प डेस्क स्थापना यानागु नं वयकलं धयादिल ।
थज्याःगु इलय् स्वास्थ्यकःमि व चिकित्सकया मनोबल थकायेगु खँय् थःपिन्सै विशेष ध्यान बियागु मेयर महर्जनया धापू दु ।
‘थुगु इलय् स्वास्थ्यकःमि व चिकित्सकयात माःगु थीथी स्वास्थ्य सामग्रीलिसें पिपिईया व्यवस्था यायेधुनागु दु । लिसें स्वास्थ्यकःमिया उच्च मनोवल कायम यानातयेत न्हिं न्यासः तका भत्ताया नं व्यवस्था यानागु दु’ महर्जनया धापू खः ।
एकल महिला, अपाङ्खता व ६ महिना सुत्केरी, दैनिक ज्या मजदुरी यानाः नयेमाःपिनिगु धलः तयार यानाच्वनागु धासें मेयर महर्जनं धलः तयार जुइधुंकाः राहत प्याकेज घोषणा यायेगु वयकःया धापू खः ।
लिसें वयकलं नगरपालिकाय् विदेशं वःपिं झन्डै ४० धइथें दुगु धासें व मध्ये ३०म्हेसिया स्वाब परिक्षण जुइधुंकूगु व ल्यं दुपिं १०म्ह नं होम क्वारेन्टाइनय् दुगु जानकारी बियादिल ।
गोदावरी नगरपालिकाय् कोरोनाया लक्षण दुपिं आःतक्क सुं हे मदुनिगु धासें सुं विरामी खनेदत धाःसा सितिकं वासः यायेगु नं वयकलं धयादिल । उकिया नापं सुयां मृत्यु जूसा मृतकया परिवारयात १० लख तका क्षतिपुर्ति उपलब्ध याकेगु नं वयकःया धापू खः ।
अत्यावश्यक ज्वलंया पसः चायेकेत ई क्वःछीबलय् झन भीडभाड अप्वइगु जूगुलिं खाद्यान्न, तरकारी, मेडिकल लगायतया पसः निर्वाध रुपं चायेकेबियागु नं वयकलं धयादिल ।
नगरपालिका दुने कोरोना भाइरस रोकथाम व नियन्त्रणया ज्या प्रभावकारी रुपं न्ह्यःने यंकेत ५१ लख तकाया आकस्मिक कोष दयेकागु, जानकारी ब्युसें स्थानीय संघसंस्था, व्यापारीयात नं उगु कोषय् ग्वाहालि यायेत वयकलं इनाप यानादिल ।
Categorized in राष्ट्रिय
