कोरोनया हटस्पट जुजुं वनाच्वंगु स्वनिगः
जुजुमान महर्जन
थौंकन्हय् कोरोना संक्रमित जूपिनिगु ल्याः अप्वया वंलिसे स्वनिगलय् नं कोरोना संक्रमित जूपिनिगु ल्याः अप्वयावंगु दु । म्हिगःया दिनस विशेष यानाः जःलाखःला देय् भारतलिसे स्वानाच्वंगु जिल्लाय् कोरोना संक्रमित जूपिनिगु ल्याः अप्वया वनाच्वंगु खःसा थौंकन्हय् तराई क्षेत्रलिसें भारतं वइपिनिं स्वनिगलय् दुहां वय्वं कोरोना संक्रमित जूपिनिगु ल्याः नं अप्वयावंगु दु ।
थौंकन्हय् स्वय्गु खःसा स्वनिगः विशेष यानाः येँ जिल्लाया अप्वः थासय् म्हो वा अप्वः जुइमा, कोरोना संक्रमित जूपिं खनेदु । खय्त ला सरकारं हे नं स्वनिगलय् संक्रमित जूपिं थुकथं हे अप्वया वनीगु खःसा अस्पतालय् थाय् मदयाः छेँछेँय् च्वनाः वासः याय्माःगु अर्थात होम आइसोलेसनय् च्वनेमाःगु अवस्था वइगु ख्याच्वः बीधुंकूगु दु ।
थौंकन्हय् स्वनिगलय् शटडाउनया अवस्था खः । गन गन कोरोना संक्रमित जूपिं खनेदत, उगु थाय् सील यानाः ट्रेसिङ याय्गु ज्या न्ह्याकाच्वंगु दु । खय्त ला सरकारं ‘मास’य् पिसिआर टेष्ट याय्गु ज्या जूगु मदुनि । यदि थथे याःगु खःसा स्वनिगलय् संक्रमित जूपिनिगु ल्याः तसकं हे भयावह खनेदइगु विज्ञतसें धया वयाच्वंगु दु । थुगु खँयात थौंकन्हय् सरकारं पिसिआर टेष्ट यानाच्वंगु प्रतिशतया ल्याखं पुष्टि यानाच्वंगु दु ।
वंगु आइतवाः जक देय्न्यंक च्याद्वःगु नमूना टेष्ट याःगु इलय् थ्यंमथ्यं प्यसःम्ह कोरोना संक्रमित जूगु पुष्टि जूगु खःसा उकी नं ग्वीम्ह येँ जिल्लायापिं खः । अथे हे, स्वनिगलय् द्वःछि स्वयां अप्वः मनूत कोरोनापाखें संक्रमित जूगु पुष्टि जुइधुंकूगु दु । थ्व ल्याखं स्वनिगः कोरोनाया हटस्पट जुजुं वनाच्वंगु अनुमानयात नं लिक्क लाकाब्यूगु दु ।
कोरोना संक्रमणयात कयाः विशेष यानाः नाका नाकाय् कडा याय्माःगु नं स्वनिगःया महानगरपालिका एवं नगरपालिकाया प्रमखतसें कोभिड १७ संक्रमण व्यवस्थापन केन्द्रयात सुझाव बीगु ज्या जुइधुंकूगु दु । नाकाय् संक्रमण जू वा मजू धकाः स्वाब संकलन यानाः परीक्षण याय्गु ज्या जूसां नं संक्रमित जूपिं याउँक हे स्वनिगलय् दुहाँ वयाच्वंगु दु । थुकिं यानाः सुरक्षा व्यवस्था गुलि कमजोर धइगु खँ ला येँया महाबौद्धया कोरोना संक्रमितपाखें नं सीदु ।
मेखे स्वाब संकलन याय्धुंकाः उमित परीक्षणया लिच्वः पिहां मवःतलय् क्वारेन्टाइनय् तय्गु व्यवस्था मजूगु व संक्रमण पुष्टि जुइधुंकाः संक्रमितत गन दु धइगु हे सीके थाकूगु अवस्था नं स्वनिगलय् दुनेदुनें संक्रमण न्यनावनाच्वंगु खँय् निगू मत मदु । संक्रमण न्यना मवंकेत सरकारं यक्व हे नीति दय्केगु ज्या जूसां नं छखे जनतायाके हेपाहा प्रबृत्ति, निगूगु जनचेतनाया कमि खःसा व स्वयां अप्वः स्वनिगलय् दुहां वइपिनिगु नितिं कडा कारवाही मजूतलय्, नीतिया उचित कार्यान्वयन मजूतलय् स्वनिगलय् कोरोना संक्रमित अप्वया वनीगु खँय् शंका मदु ।
थजाःगु हे अवस्था जूसा स्वनिगः याकनं हे कोरोनाया हटस्पट जुइगु खँय् अप्वःस्यां ग्यांचिकु मिखां स्वयाच्वंगु दु । थुगु खँय् सम्बन्धित निकाय याकनं हे ध्यान बीमाःगु खनेदु ।
