कोरोनापाखें मेम्ह भूपू सैनिक मन्त
लहना न्यूज | ने.सं. ११४० चौलागा दसमि (१७ अप्रिल २०२०), शुक्रवाः
बेलायतय् कोरोनापाखें मेम्ह छम्ह पूर्व गोरखा सैनिक सित ।
लण्डनया न्यू माल्डेनय् च्वना वयाच्वंम्ह ७५दँया धनवीर थापामगर वासः यायेगु झ्वलय् मदुगु खः । सासः ल्हायेबलय् समस्या खनेदयेधुंकाः वय्कःयात वंगु मंगलवाः किङ्गस्टन अस्पतालय् भर्ना याःगु खः ।
वय्कःयात भेन्टिलेटरय् तयाः वासः यानाच्वंगु खः । पाल्पा स्थायी छेँ दुम्ह थापा लिपा बुटवलय् बसाइसराइ जूगु खः ।
न्हापांनिसें च्वःप्वःचा व उच्चरक्तचापया नियमित वासः नया वयाच्वनादीम्ह थापायात ज्वरो वयेवं अस्पताल भर्ना याःगु पाल्पा जिल्ला समाजया नायः बाचस्पति रेग्मीं जानकारी बियादीगु खः ।
नायः रेग्मीया कथं थापा जहानलिसें सन् २००९ निसें बेलायतय् च्वना वयाच्वंगु खः ।
Categorized in राष्ट्रिय
