कोरोनाया इपिसेन्टर आः अफ्रिका जुइगु आशंका
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
इम्पेरियल कलेज लण्डनं म्हिगः शुक्रवाः पितब्यूगु छगू रिपोर्टपाखें थुगुसी कोरोना भाइरसपाखें अफ्रिकाय् ३गू लख स्वयां अप्वः मनूत सीफइगु न्ह्यथंगु दु ।
अफ्रिकाया संयुक्त राज्य आर्थिक आयोगं ब्यूगु प्रतिवेदनकथं भाइरस विरुद्ध छुं नं कथंया हस्तक्षेप मजुइगु खःसा दकलय् बांमलाःगु अवस्थाय् अफ्रिकाय् ३.३गू मिलियन मनूत सीगु व १.२गू बिलियन मनूतय्के संक्रमण खनेदयेफु ।
सामाजिक दूरीयात कडारुपं नालाकाःसां नं अफ्रिकाय् १२२गू मिलियन स्वयां अप्वः मनूतय्के कोरोनाया संक्रमण खनेदयेफूगु रिपोर्टय् न्ह्यथनातःगु दु ।
म्हिगः शुक्रवाःतक अफ्रिकाय् १८द्वः स्वयां अप्वः मनूतय्के भाइरसया संक्रमण पुष्टि जुइधुंकूगु दु । तर विज्ञपिनिगु कथं छुं वालय् हे अफ्रिकाय् थुगु महामारीया बृद्धिदर यूरोपय् स्वयां अप्वः खनेदयेफु ।
Categorized in अन्तर्राष्ट्रिय
