कोरोनाविरुद्ध लडाइँ ल्वायेत सरकारया ग्वाहालि यायेत राष्ट्रपतिया इनाप
लहनान्युज | चौलाथ्व दशमी ११४०, चैत्र २१
राष्ट्रपति विद्यादेवी भण्डारीं कोरोना भाइरस (कोभिड–१९)विरुद्धया लडाइँलय् सरकारयात ग्वाहालि यायेत इनाप यानादिगु दु । कोरोना भाइरसया देय् यकं युद्धमैदान जुइ धुकुगु दु धयादिसे थुगु लडाइँलय् मानवजाति हे त्याइगु विश्वास यानादिगु दु ।
थौं शुक्रवाः देशवासीया नामय् सम्बोधन यानादिसे राष्ट्रपति भण्डारीं छु न भावनाय् मवसे कोरोना भाइरसयात गम्भीरता कया मनन यासे थुकिगु रोकथाम, नियन्त्रण व वासः याकेत नेपाल सरकार याःगु पलाखय् ग्वाहालि यानादित इनाप यानादिगु दु ।
थौं या महामारीया इलय् दकलय् अप्वो जोखिमयुक्त न्ह्यने च्वना ज्या यानाच्वपिं चिकित्सक, स्वास्थ्यकःमि, कर्मचारीपिनिगु ज्याय् प्रशंसा न यानादिगु दु । वयकल छिकपिन्त ग्वाहालि यायेत राज्य दु धइगु खँ न न्ह्यथनादिगु दु ।
वयकल कोरोनापाखे संक्रमित जुया वासः याकाच्वपि सकल नेपाःमि दाजु किजा व तता केँहपिनिगु भिं उसाँयया कामना यानादिगु दु ।
थुगु महामारीविरुद्धया लडाइँलय् माःगु योगदान यायेत दक्को राजनीतिक दल, उद्योगपति, व्यापारी, विज्ञ, सञ्चारकःमि, स्थानीय समुदाय नापं स्वयंसेवी संस्थायात वयकलं आह्वान यानादिगु
दु ।
