कोरोना फैले जुलकि संसद हे क्वारेन्टिनय् वनेमालीइ : मिनेन्द्र रिजाल
लहनान्युज | बछलाथ्व दशमी ११४०,जेष्ठ ४ आइतवाः
नेपाली कांग्रेसया सांसद डा. मिनेन्द्र रिजालं नीति तथा कार्यक्रम सार्वजनिक यायेगु नामय् सरकार सांसदया स्वास्थ्य सुरक्षाप्रति संवेदनहीन जुगु द्धपः बिःगु दु ।
कोरोना संक्रमणया जोखिम न्यूनीकरणया लागि छेँय् च्वने माःगु, सामाजिक दुरी कायम याये माःगु लगायत सावधानी याये माःगु सांसदपिन्त ३ घण्टा तक बन्द कोठाय् कुना नीति तथा कार्यक्रम सार्वजनिक याःगु प्रति सांसद रिजालं आपत्ती प्वका दिगु दु ।
प्रतिनिधिसभाय् थौं आइतवाः च्वंगु बैठकय् आर्थिक वर्ष २०७७ व ७८ या लागि सरकारं बार्षिक नीति तथा कार्यक्रमय् थःगु धारणा तयेगु झ्वलय् सांसद रिजालं सरकार संसद व सांसदप्रति जिम्मेवार मजुगु आरोप बियादिगु खः ।
सांसद रिजालं नीति तथा कार्यक्रम स्रोत साधनं छ्ये मफइगु उच्च आंकाक्षाया दस्तावेज, उपदेश जक जुगु संघीयतासम्मत मजुगु धका थःगु खँ तयादिगु खः ।
कोरोनां देय् दकलय् तधःगु आर्थिक संकट उत्पन्न जुइ फइगु आकलनया साथ अर्थतन्त्र पुनरुत्थानय् नीति तथा कार्यक्रम केन्द्रीत मजुगु धका धयादिगु खः ।
नेपाली कांग्रेसया पाखे सककारया नीति तथा कार्यक्रमय् दर्ता जुगु संशोधन प्रस्तावय् प्रस्तावकया रुपं धारणा तयादिम्ह सांसद रिजालं नीति तथा कार्यक्रमया बुँदा १ निसे २७६ तक हे संशोधन याये माःगु माग यानादिगु खः । बुँदा नम्बर ११, १९ व २३१ य् सांसद रिजालं आपत्ति प्वकादिगु खः।
नेता रिजालं सीमा अतिक्रमणय् सरकार गम्भीर व संवेदनशील मजुगु आरोप न बियादिगु दु ।
झीगु सीमा अतिक्रमण जुगु दु धयादिसे सरकारया नीति कार्यक्रम स्वय वलय्या भ्वँतय् जक सरकारं लित हइगु दावी यानादिगु दु ।
