कोरोना लिपा जक गुथि समितिं ज्या याइगु
लहनान्युज | चिल्लागा औसी ११४०
वःगु छुन्हि निसे विवादय् लानाच्वंगु गुथि विधेयक बारे नेवाः समुदायया सुझाव कायेगु लागि भूमिसुधार मन्त्रालयं प्रतिनिधिसभाया सांसद जीवनराम श्रेष्ठया संयोजकत्वय् छगु समिति गठन याःगु दु ।
प्रतिनिधिसभाया सांसद जीवनराम श्रेष्ठ देशय् कोराना भाइरसया सन्त्रास ब्वलनाच्वंगु इलय् लाक्क समिति गठन जूगु खँयात छगू संयोग जक खः धासें उकियात अन्यथा रूपं कयामदीत इनाप यानादीगु दु ।
कोरोना भाइरसया संक्रमण पनेगु लागिं सरकारं थौंनिसे लकडाउन याःगु इलय् हे गुथि सम्बन्धी समिति समेत गठन याःगु खँय् थीथी न्ह्यसः वयाच्वंगु सन्दर्भय् लहनान्युजयात सांसद श्रेष्ठं थुगु खँ कनादीगु खः ।
सांसद श्रेष्ठं गुथि सम्बन्धी आन्दोलनया न्ह्यलुवापिं व गुथियारपिंलिसे जुयाच्वंगु खँल्हाबल्हाया लिधंसाय् हे थ्व समिति गठन जूगु खः धका धयादिसे थुगु इलय् गठन जूगु जानकारी नं बियादिगु खः ।
थुगु समितियात रिपोर्ट बीगु लागिं लछिया ई बियातःगु दु धयादिसे थ्व लछि धइगु समितिया न्हापांगु बैठक च्वंगु न्हिनिसें शुरु जुइ धका धयादिसे बैठक न्ह्यः हे सकलसित नाप सहलय यानाः जक लिपा माइन्युट जक औपचारिक रूपं यायेगु वा समितिया म्याद न थपे याये फइगु विकल्प दुगु खँ नं लहानन्युजयात कनादिगु दु ।
थुगु इलय् सरकारं लकडाउनया याउगु इलय् समिति गठन याःगु खःसां तुरुन्त हे समितिं थःगु ज्याखँ धाःसा मन्ह्याकीगु देय् याउगु स्थिति सामन्य जुइवं ज्या न्ह्याकिगु धका न सांसद श्रेष्ठ धयादिगु खः ।
थुगु समितिं सम्बन्धित गुथियार व गुथि आन्दोलनया न्ह्यलुवापिंलिसे सहलह याना जक प्रतिवेदन तयार यायेगु जुइलि थुुकि सुनां नं शंका याये मालि मखु धका न धयादिगु दु ।
सांसद श्रेष्ठं थुगु समितियात गुथि सम्बन्धी संघर्ष समितिपाखें नं प्रतिनिधि थपे यायेगु अधिकार बियातःगु दु धका धयादिसे प्रतिनिधिपिं नं संघर्ष समितिलिसे सहलह यानाः माःगु सुझाव कायेगु जुइ न धयादिगु दु ।