२०७७ माघ १३, मंगलबार

कोरोना संक्रमणय् असफल जुजुं वनाच्वंगु सरकार

जुजुमान महर्जन
 
थौंकन्हय्या तथ्याङ्क स्वय्गु खःसा स्वनिगः कोरोना भाइरस (कोभिड–१९)या नितिं हटस्पट जुजुं वनाच्वंगु दु । छन्हुं हे कोरोना भाइरसपाखें संक्रमित जूपिनिगु ल्याः नीन्हय्सःम्ह स्वयां अप्वः थ्यनाच्वंगु दु । तर स्वनिगलय् थ्व स्वयां नं अप्वः मनूतय्त संक्रमण जुयाच्वंगु अनुमान याना वयाच्वंगु दु । विशेष यानाः सरकारं रियल टाइम पिसिआर टेष्ट अप्वः याइगु इलय् संक्रमणया ल्याः अप्वइगु व म्हो याइगु इलय् म्हो हे जक ल्याः न्ह्यब्वयाच्वंगु दु ।
 
थ्व ल्याखं धाय्गु खःसा संक्रमित जूपिनिगु दर कुहाँ वयाच्वंगु खनेमदु । अझ धाय्गु खःसा देय्न्यंक पिसिआर टेष्ट यानाः पिहाँवःगु लिच्वःया थ्यंमथ्यं ख्वीगूनिसें न्हय्गू प्रतिशत स्वनिगःयापिं हे दु । थुकियात दुवाला स्वय्गु खःसा स्वनिगलय् कोरोना महामारीयात पनेमफइगु स्थिति खनेदय्धुंकूगु दु । गुलिखय् अस्पतालय् वासः याय्गु भेन्टिलेटर व आइसीयू हे मदयाः ल्वगितसें थःगु ज्यान तंकेमालाच्वंगु अवस्था दु ।
 
स्वास्थ्य तथा जनसंख्या मन्त्रालयपाखें न्हियांन्हिथं बिया वयाच्वंगु प्रेस ब्रिफिङय् तकं प्रवक्तां स्वनिगलय् जक मखु, देय्न्यंक हे नं वासः याय्गु नितिं वेडया अभाव जूगु हुनिं तसकं थाकूगु अवस्थाय् जक अस्पताल वय्त इनाप याःगुलिं नं देसया स्वास्थ्य उपचारया अवस्था गन थ्यनाच्वंगु दु धइगु स्पष्ट जूगु दु । अथे खःसा जनस्वास्थ्ययात कयाः ध्यान बीमाःगु निकाय अर्थात सरकार धाःसा सत्ताया कासाय् हे जक तक्यनाच्वंगु खनेदु । 
 
खय्त ला सरकारी निकाय बालुवाटारय् सुरक्षाकःमिलिसें प्रधानमन्त्रीया सल्लाहकारपिं आः वयाः पर्यटन मन्त्री, शिक्षा मन्त्रीयात तकं कोरोना भाइरस संक्रमण खनेदय्धुंकाः महामारीया अवस्था गनतक थ्यनेधुंकल धइगु क्यनाच्वंगु दुसा थुकियात कयाः सरकारं यानाच्वंगु ज्यायात नं स्पष्ट यानाब्यूगु दु । रोगं तःमि वा चीमि, निम्न व उच्च वर्ग, पदयापिं धकाः ल्यइमखु, अथेखःसां थुकियात नियन्त्रण याय्गु नितिं यानाच्वंगु सरकारया ज्या गुलि छ्वासु धइगु खँयात उलाब्यूगु दु । अथेखःसां सरकारया प्रवक्तालिसें मन्त्रीं कोरोना नियन्त्रणय् स्वनिगः ल्यूने लानाच्वंगु दु धकाः मछाःमजूसे अभिब्यक्ति बियाच्वंगु दु ।
 
कोरोनाया महामारीं जक मखु, वासः याय्गु खँय् नं सरकार चुकय् जूगु खनेदु । विशेष यानाः सरकारी अस्पतालय् कोरोनाया वासः याय्बलय् म्हो जक धेबा खर्च जुइगु खःसा व हे वासः सरकारं अनुमति बियातःगु ततःधंगु अस्पतालय् धाःसा लखौं लख फुकेमालाच्वंगु अवस्था दु । छम्ह साधारण मनू लखौंलख फुकाः वासः याय्गु अवस्था दु वा मदु धइगु नं सरकारयाके ज्ञां मदुथें च्वं । मखुसा कोरोनाया नामय् लखौंलख दां अस्पतालं म्हयाच्वंसां नं सरकार मौन हे जुयाच्वंगु दु ।
 
थुगु अर्थय् देसय् न्ह्याम्हेस्यां न्ह्याग्गु याःसां ज्यू, अर्थात सरकार हे मदुगु खःला धइगु तकं अनुभव याना हयाच्वंगु दु । सरकारया उच्च पदस्थ मनूतसें सरकारया धुकुति स्वाहा यानाः उपचार याइ, तर सर्वसाधारणतसे गुकथं वासः याय्गु खः धइगु खँय् नं ध्यान बियाः थुखेपाखे सरकार न्ह्यचिलेमाःगु खनेदु । थुगु यथार्थयात कयाः सरकारया मूल्यांकन यानाच्वगु दु धइगु खँय् सम्बन्धित निकायं च्यूताः क्यनेमाःगु थौंया आवश्यकता खः।