युरोपेली देय् कोसोभां थःगु देशय् दूगु कारागारया ३सः कक्ष डेनमार्कयात बालं बिइत्यंगु दु ।

डेनमार्कय् कैदी बन्दीतये ल्याः तसकं अप्वयावनेधुंका कोसोभाें डेनमार्कयात दँय्ुदसं १५गू मिलियन युरोय् कारागार बालं बिइत्यंगु खः ।

बालं बिइगु  कारागारया कक्षय् गैर इयु देय्या बन्दीतयेत तयेत्यंगु दु । कोसोभोय् ७ सः निसें ८सः कारागार कक्ष खाली दूगु हुनिं  डेनमार्क  व कोसोभो दथुइ कारागार लिज सम्झौता जूगु खः ।

थुगु सम्झौता आःयात  ५दँया नितिं जूसा नं ई कथं परिमार्जन जुइ फइगु संभावना दूगु न्ह्यथंगु दु । अयेसां थुगु  सम्झौतायात संसदया ३ब्वय् निब्वया बहुमतं पारित यायेमाः ।

कोसोभोया राजधानी प्रिस्टिनां ५०गू किलोमिटर तापाक्क खाली दूगु कारागारया डेनमार्कया अधिकारीतयेसं निरीक्षण याइगु जूगु दु ।

थुखे डेनमार्कं कैदीतयेत  छेँजःया स्वापूपाखें तापाक्क यंकेगु निर्णय याःगु धका कोसोभो व डेनमार्कय् आलोचना जुइगु न्ह्यागु दु ।

Categorized in अन्तर्राष्ट्रिय