नेपाल क्रिकेट संघ क्यानं एसीसी यु–१९ मिजं एशिया कप क्रिकेट धेंधेंबल्लाया नितिं २०म्ह दुजःया कासामिया छनोट याःगु दु ।

थ्वहे डिसेम्बरय् ग्वसाःग्वइगु धाःगु उगु धेंधेंबल्लाया नितिं क्यानं २०म्ह दुजःया कासामियात बन्द प्रशिक्षणय् सःतूगु खः । क्यानं थौं कन्हय् क्वचागु यु–१९ राष्ट्रिय पुरुष क्रिकेट धेंधेंबल्लाय् उत्कृष्ट ब्वज्या याःपिं २०म्ह कासामियात बन्द प्रशिक्षणय् सःतूगु न्ह्यथंगु दु ।

क्यानया कथं नेपाली टोलीं बुधबाः निसें प्रशिक्षण न्ह्याकेत्यंगु दु । एशिया कप क्रिकेट संयुक्त अरब इमिरेट्स (युएई) य् डिसेम्बर २० निसें जनवरी २ तारिख तक्क जुइगु धलः दु ।

उगु धेंधेंबल्लाखय् नेपाःलिसें ग्वसाःखलः युएई, भारत, पाकिस्तान, बङ्गलादेश, श्रीलङ्का, अफगानिस्तान व कुवेतया ब्वति दुथ्याइगु जूगु दु । बन्द प्रशिक्षणय् छनोट जूपिं कासामिइ देव खनाल, मोहमद हुसेन, वसिर अहमद, सन्तोष कार्की, विवेक यादव, विवेक राना मगर, तिलक राज भण्डारी, सोनु अन्सारी, दिपेश कँडेल व अर्जुन यादव दु ।

अथेहे कमल परियार, अनुजकुमार चुनारा, प्रकाश जैशी, वसन्त कार्की, अर्जुन साउद, शेर मल्ल, राहुल भण्डारी, गुलशन झा, विपिन शाही व आदील अन्सारी छनोटय् लाःगु दु ।

Categorized in कासा