क्यानलिसें कचवं ज्यनेधुंका क्रिकेट टिमया बन्द प्रशिक्षण न्ह्यात
थिंलागा तृतीया ११४२, पुस २१ बुधबाः
क्रिकेट कासामि व नेपाल क्रिकेट संघ (क्यान) या कचवं ज्यनेधुंका नेपाली क्रिकेट टिमया बन्द प्रशिक्षण न्ह्यागु दु ।
फेब्रुअरीइ ओमानय् जुइगु ट्वान्टी–२० विश्वकप छनोट कासाया नितिं फुक्क कासामि बन्द प्रशिक्षणय् दुथ्यागु दु ।
क्यानं सार्वजनिक याःगु ३०म्ह कासामि मध्ये कारवाहीलय् लाःपिं ४ म्ह कासामिलिसें फुक्क कासामि बन्द प्रशिक्षणय् वःगु क्यानं न्ह्यथंगुृ दु ।
सेन्ट्रल कन्ट्रयाक्टय् वर्गीकरणया विषयलय् सञ्चारमाध्यमय् न्ववागु हुनिं ४म्ह कासामि ज्ञानेन्द्र मल्ल, दीपेन्द्रसिंह ऐरी, सोमपाल कामी व कमलसिंह ऐरीयात क्यानं कारवाही याःगु खः ।
वयांलिपा क्रिकेट संघ व कासामि दथुइ कचवं तच्वगु खः । क्यानं मल्ल व ऐरीयात कप्तान व उपकप्तान पदं चिइका ल्याम्ह लेग स्पिनर सन्दीप लामिछानेयात न्हूम्ह कप्तानया भाला बिउगु खः ।
Categorized in कासा